Spitali i Traumës po vuan nga mungesa e ilaçeve bazë dhe antibiotikëve. Këtë fakt e denoncoi Kryetarja e Komisionit të Shëndetësisë dhe Çështjeve Sociale, Albana Vokshi, bashkë me deputetë të PD-së, dhe drejtues të Departamentit të Shëndetësisë së Partisë Demokratike, Arbiola Halimi, Roland Keta dhe Gazmend Koduzi, të cilët vëzhguan nga afër situatën e rënduar në Spitalin e Traumës në Tiranë.
“Miliona euro në muaj ndahen për koncesione dhe check-up, të cilat mund të furnizonin me barna bazë spitalet, ose të shërbenin për ndërtimin e spitaleve dhe qëndrave të reja shëndetësore”- tha Vokshi.
Në bazë të Ligjit për Sigurimet Shëndetësore çdo qytetar shqiptar gëzon të drejtën e kurimit në spitalet publike falas por ata detyrohen të paguajnë vetë për ilaçet bazë të cilat nuk sigurohen nga spitali.
Madje pacientët paguajnë vetë protezat të cilat kushtojnë nga 1 mijë e 500 deri në 3 mijë e 500 euro.
“Mungojnë protezat, mungojnë vidat, mungojnë pllakat dhe vetëm njëra prej protezave shkon nga 1 mijë e 500 deri në 3 mijë e 500 euro. Familjarët detyrohen që ti blejnë të gjitha vetë. Ne takuam edhe familjarë të pacientëve të cilët jo më larg se dje, pavarësisht deklaratave të Ministrit të Shëndetësisë, i kanë blerë vetë antibiotikët dhe barnat dhe medikamente të tjera. Jemi këtu ne të gjithë deputetët e Komisionit të Shëndetësisë dhe Çështjeve Sociale të Partisë Demokratike dhe Departamentit të Shëndetësisë së PD, për ti bërë thirrje ministrit, për t’i bërë thirrje kryeministrit që të furnizojë në mënyrë urgjente Spitalin e Traumës që të ketë furnizim të vazhdueshëm e jo sa herë që del ai në televizor për të bërë propagandë.”- u shpreh Vokshi.
Nisur nga rëndësia e shërbimit të këtij spitali, deputetet e Partisë Demokratike kërkuan që Spitali i Traumës të marrë status të veçantë.
