Gjykatësja Zeqine Sollaku, bashkëshortja e ish-kryeprokurorit të Përgjithshëm nuk do të jetë më pjesë e trupit gjykues në çështjen e Top Channel.
Pas kërkesës së dy paditësve Albert Sino dhe Aurel Baçi që zotërojnë 60% të aksioneve të Top Channel kundrejt Vjollca Hoxhës, Zina Sollaku nuk do të jetë më gjyqtare e çështjes. Ata pretenduan se Sollaku ishte në konflikt interesi pasi ka lidhje të afërta me pronaren Vjollca Hoxhën.
Është tashmë një fakt i njohur publik lidhja e fortë shoqërore midis dy vajzave të tyre, Adela Sollaku dhe Lori Hoxha, të cilat jo rrallë shfaqin përmes fotove dhe videove afrinë e tyre.
(Në foto: Vajza e Vjollca Hoxhës, Lori, bashkë me vajzën e gjyqtares Sollaku, Adela Sollaku)
Javët e fundit madje, teksa në Apel pritej të gjykohej çështja ku Zeqine Sollaku do të merrte vendimin nëse Top Channel duhej t’i mbetej apo jo nën administrim Vjollca Hoxhës, dy vajzat e tyre shfaqeshin në plazhet e ishujve tropikalë Maldive duke u argëtuar dhe festuar së bashku.
Kjo afërsi është gjykuar nga pala paditëse si konflikt interesi dhe pikërisht për këtë gjyqtarja Sollaku është larguar nga ky proces.
