Shefqet Kastrati dhe Ardian Bardhi, dy biznesmenë që dyshohet se janë “gjobitur” nga Emiljano Shullazi, kanë mohuar thuajse me të njëjtat terma të kenë ndonjë lidhje me të dyshuarin.
Ditën që Gjykatë për Krime të Rënda dha masën e sigurisë “arrest në burg” për Emiljano Shullazin, Gilmando Dani dhe Blerim Shullazin, si të dyshuar për disa vepra penale, përfshirë edhe “gjobvënien”, administratori i “Kastrati Group” dhe përfaqësuesi i “Pascucci Caffe” në Shqipëri, njoftojnë se nuk kanë pasur asnjë kërcënim nga personat e dyshuar.
Në deklarimet e tyre për median, si Kastrati, ashtu edhe Bardhi, kanë përdorur thuajse të njëjtin tekst për të hedhur poshtë faktin se ata janë “viktima” të gjobave të vendosura nga Shullazi.
Shefqet Kastrati, pronari i kompanisë së naftës “Kastrati”, në letrën publike, shprehet se “…Nuk kemi pasur asnjë kontakt, bisedë, presion apo shantazh nga asnjë person, madje personat e përmëndur në lajm si Emiljano Shullazi etj, nuk i kemi njohur kurrë. As prokuroria, policia dhe asnjë strukturë tjetër ligjzbatues nuk është investuar nga ne dhe as nuk na ka kërkuar, pyetur apo verifikuar rreth këtij aludimi të pavërtetë”.
Po ashtu, Ardian Bardhi, administrator i disa bizneseve në Durrës, si edhe përfaqësues në Shqipëri i “Pasccuci-t”, shprehet: “…Asgjë nga ato që thuhet nuk është e vërtetë. Nuk kam pasur asnjë kontakt, presion apo shantazh. Nuk e kam njohur kurrë Emiljano Shullazin dhe asnjë strukturë ligjzbatuese nuk më ka pyetur…”.
Pra, të dy biznesmenët shprehen njëlloj se “nuk kanë pasur asnjë kontakt, presion apo shantazh”. Po ashtu, të dy shprehen në mënyrë të njëjtë se “nuk kanë asnjë njohje me Emiljano Shullazin”. Në të njëjtin paragraf, gjendet edhe ngjashmëria e tretë ndërmjet dy biznesmenëve: “Asnjë strukturë ligjzbatuese nuk na ka pyetur”.
Është disi e vështirë të besohet që mund të jetë tërësisht e rastësishme që dy persona, pa lidhje të dukshme me njëri-tjetrin, të përdorin të njëjtin fjalor. Gjithësesi, mund të ketë ndodhur që Kastrati dhe Bardhi të kenë diskutuar së bashku qëndrimin publik.
Ndërkohë, mund të ekzistojë edhe një mundësi e fundit. Burime të pakonfirmuara, por të besueshme të “Boldneës.al” pretendojnë se kanë parë pasditen e së martës Shefqet Kastratin duke kërkuar të takojë Ministrin e Brendshëm, Saimir Tahiri. “Boldneës.al” nuk garanton vërtetësinë e këtij informacioni, por, duke vlerësuar besueshmërinë e burimit të saj, ndoshta nga ky takim ka rrjedhur edhe “rastësia” në mohimet e ngjashme publike të Shefqet Kastratit dhe Ardian Bardhit për “gjobvënien” e dyshuar prej Shullazit.
