Emiljano Shullazi e ka humbur mbështetjen e strukturave të larta të Policisë, gjithnjë nëse konsiderohen të mirëqena akuzat publike të opozitës se ai është ndihmuar prej kryeministrit dhe ministrit të Brendshëm.
Saimir Tahiri, në një postim në rrjetin social “Facebook” vetëm disa orë pas ndalimit të Shullazit, ripërsëriti shprehjen se “..tashmë për Policinë e Shtetit nuk ka asnjë mbi ligjin..”, duke iu referuar faktit se i konsideruari “i paprekshëm” tashmë është nën prangat e uniformave blu.
Në postimin e tij, ministri i Brendshëm nuk e përmend emrin e Shullazit, duke e nënvlerësuar mitin e këtij personazhi të “malavitës”. Në rreshtat e statutit të tij, krahas shablloneve politikës, Tahiri tregohet më i drejtëpërdrejtë për rolin e Policisë së Shtetit në ndalimin e Shullazit, se sa vetë njoftimi zyrtar i Policisë së Tiranës. Blutë e kryeqytetit, në informacion zyrtar për median, janë treguar më shumë se sa rigoroz, kur e kanë theksuar faktin se Emiljano Shullazi, Gilmando Dani dhe Besmir Shullazi janë ndaluar me urdhër të Prokurorisë për Krime të Rënda.
Pra, në mes rreshtash, Policia dukej se synonte të largonte përgjegjësitë e saj nga ndalimi i tre persona, të cilët fillimisht u shoqëruan për kërcënimin ndaj kandidatit për rektor të Universitetit të Tiranës, Mynyr Koni, por që më pas iu hapën letrat edhe për disa raste të tjera gjobvënie dhe shpërthimi me tritol.
Megjithatë, qëndrimi publik i Ministrit të Brendshëm duket se ka mbështetur veprimet e Policisë në ndalimin e atij që opozita e konsideron si mikun e Tahirit.
Fakti që Shullazi, prej ditës së Shtunë, nuk e ka mbështetjen e pretenduar të policisë, duket edhe nga veprimet e Drejtorit të Përgjithshëm të Policisë, Haki Çako. Ky i fundit, në takimin e zhvilluar mbrëmjen vonë të së shtunës, thuhet se është shprehur pro ndalimit të Shullazit. Mesa duket, i bindur se lëvizja e lirë e Shullazit përbënte problem edhe për Policinë, Çako duket se ka qenë i qartë që duhet goditur miti “Shullazi”.
Këto qëndrime, dukshëm të koordinuara ndërmjet zyrtarëve të lartë të Ministrisë së Brendshme dhe të Policisë së Shtetit, u kanë ndihmuar edhe prokurorëve, të cilët duket se kanë pritur që Shullazi të humbasë mbështetjen e pretenduar, për të vepruar.
Rastësi ose jo, vendosja e prangave në duart e Shullazit përkon me kthimin nga vizita e Kryeministrit dhe Ministrit të Brendshëm nga Shtetet e Bashkuara të Amerikës, ambasadori i të cilës vetëm pak muaj më parë kritikoi institucionet e drejtësisë se përse nuk veprojnë kundër keqbërësve të tipit “Shullazi”.
