Gara e zgjedhjeve për Rektor të Univeritetit të Tiranës ka hyrë në një fazë të tensionuar mes kandidatëve.
Nëpërmjet një deklarate për shtyp, kandidatja Prof.Dr. Klodeta Dibra denoncon faktin se fushata e saj është ndërprerë nga rivali i saj Prof. Dr. Mynyr Koni.
Dibra thekson se Koni ka ndaluar pedagogët dhe studentët që të dëgjojnë programin e saj për drejtimin e Universitetit të Tiranës.
Më poshtë keni deklaratën e plotë të Klodeta Dibrës:
Duke marrë shkas nga ngjarjet e sotme, i bëj thirrje gjithë pedagogëve e studentëve të Universitetit të Tiranës të mos përdoren e të mos frikësohen për të hedhur me vullnet të lirë votën e tyre në zgjedhjet për Rektor dhe anëtarë të Senatit Akademik të Universitetit të Tiranës, në datën 20 Prill 2016. Mjetet e turpshme që u përdorën sot për të ndaluar fushatën e ndershme që do të realizohej në mjediset e Fakultetit të Shkencave të Natyrës implikojnë direkt kandidatin për Rektor Prof Dr. Mynyr Koni, konkurrentin tim në këto zgjedhje. Z.Koni përdori këtë mënyrë arkaike të ndalonte pedagogët dhe studentët të dëgjonin drejtpërdrejt programin tim për drejtimin e UT.
Të nderuar pedagogë e student!
Ju bëj thirrje të mos lejoni që dhuna verbale e përdorur në këtë fushatë për të ndaluar pjesëmarrjen e lirë tuajën në aktivitete zgjedhore të kthehet në makth për vite të tëra nëse do të votoni z. Koni.
Unë jam përpjekur që gjatë gjithë fushatës të tregohem korrekte dhe të mos përdor kundër tij asnjë nga të metat që e karakterizojnë, por ngjarja e sotme tregoi që z.Koni e përdori FSHN-në si pronë të tij duke mos lejuar vendosjen e posterave të mi në fakultet. Ç’mund të presë UT, pedagogët studentët apo i gjithë populli shqiptar, i cili pas këtyre zgjedhjeve pret një sistem arsimor të reformuar dhe serioz nga një veprim i tillë. Mos lejoni që një njeri që trembet nga konkurrentja të drejtojë Universitetin e Tiranës në vitet e ardhdhme.
