Qarku i Shkodrës mbetet më problematiku për kultivimin e bimëve narkotike dhe kjo pranohet zyrtarisht edhe nga drejtuesit e lartë të policisë së shtetit.
N/drejtori i përgjithshëm Altin Qato nga Shkodra tha se ky qark ka riskun më të lartë të kultivimit me 35%, kjo ndihmuar edhe nga terreni malor.
“Janë identifikuar 1730 parcela dhe janë asgjësuar, 285468 bimë narkotike. Qarku i Shkodrës zë rreth 35% të totalit të bimëve narkotike. Pra, është qarkun me rriskun më të lartë.”– u shpreh Qato.
Qato ishte i prerë në qëndrimin e tij kur ju rikujtoi efektivëve të policisë dhe përfaqësuesve vendorë se do të mbajnë përgjegjësi direkte nëse nuk bashkëpunojnë.
“Çdo territor ka një përgjegjës dhe ai duhet të mbajë përgjegjësi. Është porosi edhe e zt. Ministër dhe e drejtuesve të Policisë së Shtetit se në territoret ku konstatohen aktivitete të tilla do të mbajmë qëndrim për punonjësit që janë përgjegjës për kontroll territori. Punonjësi i policisë e ka për detyrë të kontrollojë territorin. Do të ketë ndjekje penale nëse ata nuk janë aktiv.”- shtoi Qato.
Edhe këtë vit tendenca e kultivimit të narkotikëve është në rritje tha drejtori i policisë së qarkut Shkodër Lorenc Panganika.
“Edhe këtë vit ka tendenca për kultivimin e bimëve narkotike. Shkaqet që e favorizojnë janë problemet ekonomike, terreni etj.”- deklaroi Panganika.
Në prag të sezonit të mbjelljes së kanabisit, edhe në Durrës zyrtarët vendorë kanë diskutuar për masat parandaluese për fenomenin. Më problematikët janë zonat malore të Krujës dhe Fushë Krujës./ Oranews
