Asnjë fëmijë i lindur para vitit 2015 nuk do të përfitojë nga bonusi prej 5 mijë lekësh që jepet nga Bashkia e Tiranës.
Dhurata e mirëseardhjes në jetë të qytetarëve të rinj të Tiranës, do tu jepet vetëm bebeve të “Rilindjes”. Kështu, vetëm të porsalindurit pas 2015 do të përfitojnë nga Bashkia e Tiranës bonusin prej 5 mijë lekësh. Janë me mijëra fëmijë që prej mesit të vitit 2012 deri në 2015-tën që duhet të marrin këtë dhuratë të Bashkisë së Tiranës.
“Shkuam për të pyetur për pagesën që përfiton fëmija nga Bashkia e Tiranës, por na përcollën duke na thënë se: “Nuk përfitoni pasi keni lindur në 2014-tën”, ka deklaruar një prind për Gazetën Shqiptare.
Sipas tyre punonjësit e bankës ku Bashkia e Tiranës kalon shpërblimin prej 5 mijë lekësh, u ka thënë se pagesa e fundit është bërë për fëmijët e lindur në maj të vitit 2012, dhe u ka ardhur dhe një listë për 2015-tën. Ata e kanë konsideruar si listë “qokash”, pasi fëmijët që e përfitojnë janë të muajve të ndryshëm.
Pas denoncimit të prindërve, Gazeta shqiptare i është drejtuar dhe Bashkisë së Tiranës për të marrë një përgjigje nga ky institucion. Bashkia e Tiranës është përgjigjur se për ata fëmijë nuk mund të përgjigjen ata, por Basha.
“Nuk do të bëhet asnjë pagesë e prapambetur, 5 mijë lekëshi do të vijohet të paguhet vetëm për fëmijët që lindin gjatë këtij viti dhe në vijim. Ata që nuk e kanë marrë, të shkojnë të interesohen te drejtuesit e mëparshëm të bashkisë”, – ka deklaruar zyra e shtypit në Bashkinë e Tiranës.
Bonus i Bebeve
Bonusi i bebeve që jepet nga Bashkia e Tiranës ka filluar të zbatohet që prej shkurtit të vitit 2008, nismë kjo e kryebashkiakut të atëhershëm Edi Rama. Nisma vitin e parë vijoi pa probleme, por nga viti në vit iu shtuan vonesat se kur kjo dhuratë shkonte në duart e fëmijëve dhe prindërve të tyre.
Në tetor 2010, ish-kryebashkiaku Rama bëri një marrëveshje me një bankë të nivelit të dytë, ku ende vijojnë të kalojnë
pagesat e bebeve, se në rastet kur prindërit nuk tërheqin bonusin e dhënë nga bashkia, Banka ofron një bonus prej 2.500 lekësh, nëse të ardhurat e “Bonusit të Bashkisë Tiranë” kalohen në Llogarinë e Kursimit për Fëmijë.
Bonusi i bebeve, edhe pse me vonesa, vijoi të jepej edhe gjatë kohës kur bashkia drejtohej nga Lulzim Basha. Lista e fundit e fëmijëve që ka shkuar në bankë për t’iu kaluar pagesa është ajo e fëmijëve të lindur deri në maj 2012.
Ndërkohë, për fëmijët e pas kësaj date, pra për bebet e lindura në qershor 2012, 2013, 2014 deri në nëntor 2015, nuk do të vijohet me pagesat; ky është një vendim i marrë nga kryetari i Bashkisë së Tiranës, Erion Veliaj, i cili u mohon këtë të drejtë mijëra vogëlushëve, vetëm për faktin se kanë lindur në kohën kur Tirana drejtohej nga ish-kryebashkiaku Basha.
Në 1 janar 2016, kryebashkiaku Veliaj priti në maternitet me çek në dorë fëmijën e parë të lindur për këtë vit, duke thënë se: “Bashkia e Tiranës, 5000 lekë për çdo bebe.
Mbajmë fjalën për çekun e bebeve, që kur të rriten ta përcjellin solidaritetin te gjenerata tjetër!” Duke rikujtuar fjalët që kryebashkiaku Veliaj ka shkruar në faqen e tij zyrtare në “FB”, lind pyetja: Po gjenerata e fëmijëve të lindur në 2013, 2014 dhe 2015, çfarë të përcjellin, zoti Veliaj?
