Dhjetra socialistë që punojnë në Bashkinë e Gjirokastrës nuk kanë shkuar të votojnë në referendumin e thirrur nga PS-ja.
Mësohet se shkak është frika e heqjes nga puna nga kryetarja e bashkisë, Zamira Rami, e cila i ka kërcenuar një ditë më parë në një takim që të mos bëhen pjesë e tij.
Ky është referendumi i parë që ndodh në Partinë Socialiste për mandatin e kryetarit të kësaj partie.
Referendumi i thirrur në Kongresin e datës 19 mars do të vendosë nëse mandati i kryetarit rinovohet automatikisht pasi ai fiton zgjedhjet dhe bëhet kryeministër.
Në orën 16.00 do të përfundojë procesi i votimit dhe pritet që mesditën e së dielës të dalin rezultatet. Gjatë ditës së djeshme kryeministri Rama dhe pjesa më e madhe e ministrave dhe deputetëve bënë thirrje për një votim masiv, për të treguar vlera të mëdha demokracie brenda partisë.
Ndërsa Ben Blushi dhe Mimoza Hafizi e shohin jo legjitim referendumin dhe bënë thirrje për vigjilencë pasi sipas tyre do të ketë trukim.
