Real Madrid ka shfryrë inatin e humbjes befasuese të pësuar në çerekfinalet e Champions League ndaj Wolfsburg kundër ekipit të Eibar. Pesë minuta lojë i kanë mjaftuar ekipit të Zinedine Zidane për të zhbllokuar takimin me kolumbianin James Rodriguez, i cili ka realizuar me një goditje dënimi perfekte. trembëdhjetë minuta më vonë vendasit kanë dyfishuar avantazhin me Lucas, i cili ka marrë një pasim nga Crsitano Ronaldo brenda zonës së rreptësisë dhe ka shënuar me lehtësi.
Në minutën e 19-të ka qenë portugezi që ka mbyllur ndeshjen, duke realizuar golin e tretë dhe duke shkruar historinë e kampionatit spanjoll pasi është bërë lojtari i parë që realizon 30 gola në gjashtë vite të njëpasnjëshme. Pokeri ka ardhur në minutën e 39-të kur Jese, i cili ka dhënë asistin për golin e tretë, ka çuar shifrat në 4-0 dhe këtë herë në rolin e “asist man” ka qenë Cristiano.
Pjesa e dytë ka qenë një formalitet për madrilenët, të cilët kanë krijuar edhe shumë raste të tjera për gol, por nuk janë treguar të saktë në finalizimin e kasioneve. Eibar, që nuk fiton në kampionat prej tetë ndeshjesh, mban vendin e dhjetë në kuotën e 38 pikëve. Kjo fitore e ka dërguar Real-in në vendin e dytë, përkohësisht, pasi Atletico Madrid do të luajë pas pak në fushën e Espanyol. “Los Blancos” do të kenë nevojë për një fitore të tillë edhe të martën e ardhshme kur do të zhvillojnë ndeshjen e kthimit të çerekfinaleve të Champions League kundër gjermanëve të Wolfsburg. Një sfidë që vlen një sezon.
Real Madrid-Eibar 4-0
Shënues: Rodriguez 5’, Lucas 18’, Ronaldo 19’, Jese 39’
Real Madrid: Casilla, Carvajal (Danilo 63’), Pepe, Nacho, Arbeloa, Isco, Casemiro (Kovacic 54’), James, Lucas, Ronaldo, Jese (Mayoral 75’). Trajner: Zidane.
Eibar: Riesgo, Capa, Pantic, Ramis, Luna, Escalante, Dani Garcia, Keko (Hajrovic 72’), Adrian (Baston 46’), Jota (Junca 46’), Sergi Enrich. Trajner: Mendilibar.
Gjyqtar: Sanchez
Kartonë të verdhë: Danilo/Garcia, Escalante, Ramis
