Gazetari Shpëtim Zinxhiria ka publikuar një incident me ministrin e Brendshëm, Saimir Tahiri, gjatë takimit që ai zhvilloi me emigrantët shqiptarë në Athinë.
Në profilin e tij në “Facebook”, gazetari ka publikuar dialogun me ministrin, i cili i ka kërkuar të fikte kamerën, duke përdorur sipas tij edhe fjalë të pahijshme.
“Ministër gangster apo rrugac? Priste një falje nga ministri po më kot, pasi gangsterët nuk dinë të sillen si njerëz, nuk dinë se ç’është edukata dhe personaliteti aq më keq kur janë të veshur në pushtet. Nuk respektojnë moshën edhe pse përball kanë baballarët e tyre…
Ministri: Fike atë kamer ti more !
Gazetari: Bëj detyrën!
Ministri: Çfarë je ti?
Gazetari: Jam gazetar, unë punën time, ti punën tënde !
Ministri: As më plas fare!
Ambasadori, gazetarit në vesh po deshe fike kameren…
Dhe kështu u bë, kamera u fik në një kohë që ministri kishte humbur toruan dhe po u kthente përgjigje emigrantëve me zë të lartë.
Dihet se i gjithë takimi është incizuar në audio nga zëdhënësi i ministrit, por edhe me kamer amatore, pra askush nuk mund të mohojë këtë sjellje prej gangsteri të tij…”- shkruan gazetari në “Facebook”.
Ndërkohë burime pranë ministrit mohojnë që Tahiri të ketë përdorur fjalor të tillë, por nuk kanë mohuar faktin që ministri i ka kërkuar të fikë kamerë.
Burime pranë ministrit ftojnë gazetarin të publikojë filmimet, për të vërtetuar akuzat ndaj ministrit Tahiri.
