Boldnews.al
Ministri i Jashtëm Ditmir Bushati është aksidentuar përgjatë Rrugës së Kombit, teksa ishte duke u kthyer nga Kosova, ku ishte i pranishëm në ceremoninë e zgjedhjes së Hashim Thaçit si president. Boldnews.al disponon fotot ekskluzive të aksidentit rrugor mes makinës së eskortës dhe asaj ku qëndronte ministri Bushati.
Nga pamjet e siguruara shihet se makina e ministrit e cila është goditur nga mbrapa, ka fare pak dëmtime, ndërkohë që makina tjetër është shtypur në pjesën e motorrit. Por pse u tentua të mbahej i fshehur ky lajm?
Lajmi fillimisht u publikua nga Boldnews.al sipas disa burimeve të marra nga njerëz që e shoqëronin Ministrin e Jashtëm. Vetëm pak minuta më vonë ishte deputetja Albina Deda e Partisë Demokratike e cila dha lajmin për aksidentin në një postim në rrjetin e saj Facebook.
“Sipas një informacioni që më erdhi, ministri Bushati me eskortën e tij kanë bërë aksident përgjatë rrugës së Kombit (në afërsi të Gëziqit). Policia e komisariatit Mirditë është në vendngjarje“, ka shkruar në Facebook, deputetja Deda.
Por Policia e Shtetit tentoi ta mbajë të fshehur këtë ngjarje duke mos dhënë detaje për aksidentin e ministrit. Burime për Boldnews.al bëjnë me dije se ngjarja mësohet të ketë ndodhur rreth orës 16:30 të ditës së sotme ndërkohë që policia e ka dhënë në njoftimin zytar se aksidenti ndodhi 18:30.
Ky njoftim zyrtar i Policisë së Shtetit mbërriti në redaksitë e lajmeve rreth 22:30, duke lënë në terr informativ se çfarë kishte ndodhur me aksidentin ku ishte i përfshirë një ministër.
“Sot me datë 08.04.2016 në oren 18:30 në vendin e quajtur Ura Fanit, në dalje të Autostradës Kalimash-Rrëshen, ka ndodhur një aksident automobilistik me pasoje vetëm dëme materiale (karambol) ku janë përfshirë dy mjete të Ministrisë së Punëve të Jashtme, në njërën prej të cilave ndodhej Ministri Ditmir Bushati. Në vendngjarje u kryen të gjitha veprimet administrative nga Seksioni i Policisë Rrugore i Komisariatit të Policisë Mirditë për t’u trajtuar nga kompanitë e sigurimit për dëmin e shkaktuar. Ministri Bushati dhe të gjithë personat e tjerë që ndodheshin në të dy mjetet nuk kanë pësuar asnjë dëmtim.”– thuhet në njoftim.
Nuk dihen shkaqet pse u tentua bllokimi i këtij lajmi, që ngre dyshime për mënyrën sesi u aksidentuan makinat e eskortës së Ministrit të Jashtëm.
