Rrëzimi i helikopterit qeveritar Cougar ditën e Mërkurë në Malësi të Madhe ka sjellë përplasje ndërmjet strukturave qeveritare në spitalin rajonal të Shkodrës. Policia Ushtarake ka ndaluar oficerët e Policisë së Shtetit të pyesnin togerin e mbijetuar të aksidentit, në të cilin humbën jetën dy kolegët e tij.
Pasi është shoqëruar për ndihmën e shpejtë në spital, hetuesit e Drejtorisë së Policisë së Shkodrës janë drejtuar në ambjentin ku qëndronte i plagosur Gerald Baramuça për të pyetur lidhur me dinamikën e aksidentit.
Të pranishëm në ambjentet spitalore dhe oficerët e Policisë dëshmojnë se nuk janë lejuar nga ana e Policisë Ushtarake për të kontaktuar me të plagosurin. Strukturat ushtarake ishin të parat që kanë trajtuar rastin, duke nxjerrë dy viktimat nga ujërat e Liqenit të Shkodrës, si edhe kanë shoqëruar të plagosurin me mjetet e tyre për të marrë ndihmën mjekësore.
Pasi janë vënë në dijeni për ngjarjen, oficerët e policisë së qytetit verior kanë marrë masat për nisjen e hetimit mbi shkaqet e aksidentit. Për të kuptuar më qartë se çfarë ka ndodhur, policia ka vlerësuar si veprim të parë pyetjen e dëshmitarit të vetëm okular të aksidentit të rëndë, togerin Baramuça. Por, ky veprim hetimor është penguar me forcë nga ana e strukturave të Policisë Ushtarake, të cilat nuk lejonin në asnjë mënyrë kontakte të strukturave të tjera me oficerin e aksidentuar. Sipas strukturave ushtarake, hetimi do të kryhej nga Policia e tyre, pasi ngjarja u takon forcave të armatosura.
Pas një debati pa zgjidhje, oficerët e Policisë Gjyqësore kanë njoftuar Prokurorin e Rrethit, Granit Shahu, i cili kishte ngritur ndërkohë grupin hetimor për të zbardhur rastin. Burimet policore dëshmojnë për “Boldnews.al” se në spital ka mbërritur prokurori i rrethit dhe vetëm pas disa diskutimesh, oficerët ushtarakë janë bindur që të lejojnë policinë të vijojë me veprimet hetimore. Gjithsesi, gjatë ditës së djeshme nuk është bërë e mundur pyetja e të plagosurit për shkak të gjendjes së tij shëndetësore. Pas mjekimit të parë në spitalin rajonal të Shkodrës, togeri Baramuça është transportuar drejt Spitalit të Traumës në Tiranë, për një mjekim më të specializuar.
