Helikopteri ushtarak i rrëzuar në Malësinë e Madhe mesditën e së Mërkurës mendohet se ka qenë i shoqëruar edhe nga një helikopter civil, i cili është larguar. Ky është një version i përcjellë nga banorët e zonës, por që nuk konfirmohet nga burime zyrtare të Policisë së Shtetit dhe Ministrisë së Mbrojtjes.
Deri në orën 15.00 të mesditës, strukturat shtetërore nuk kanë dhënë asnjë njoftim zyrtar, por kanë saktësuar se helikopteri i rrëzuar është një Cougar i flotës së Ministrisë së Mbrojtjes, i cili gjendej për një mision rutinë në zonën e veriut të Shqipërisë. po ashtu, është konfirmuar se nga aksidenti kanë vdekur dy persona dhe një tjetër është plagosur rëndë.
“Boldnews.al” do të vijojë të ndjekë zhvillimet e kësaj ngjarje, për të cilën ende nuk ka të dhënë të konfirmuara mbi shkaqet e rrëzimit të një prej helikopterëve më të mirë të aviacionit shqiptar. Po ndërkohë, “Boldnews.al” po punon edhe për të saktësuar vërtetësinë e informacioneve mbi ekzistencën e një helikopteri të dytë civil, i cili, siç shprehen banorët e zonës, po fluturonte në hapësirën ajrore të fshatit Brizhdë në të njëjtën kohë me helikopterin e rrëzuar.
Burime zyrtare të Ministrisë së Mbrojtjes nuk kanë dhënë ende një version zyrtar për qëllimin e fluturimit të helikopterit Cougar me pesë persona në bord në zonën e Malësisë së Madhe. Besohet që misioni i mjetit fluturues ka qenë monitorimi i zonave ku mund të mbillet lëndë narkotike.
