Nuk ka rëndësi nëse je i siguruar apo jo. Prej datës 1 prill çdo vizitë e kryer te mjeku okulist dhe otorinolaringologu do të kushtojë secila 1500 lekë.
Ky është urdhri më i ri i firmosur nga ministri i Shëndetësisë, Ilir Beqaj. Por kjo tarifë e sanksionuar rishtazi nuk do të aplikohet në çdo rast, por vetëm atëherë kur këto vizita do të kryhen për raportin mjekësor i cili kërkohet në kursin e patentës, si edhe për lejen e përdorimit të armëve.
URDHRI
Vetëm një muaj pasi përgjysmoi tarifat që paguajnë të pasiguruarit për vizitat te mjeku specialist, Ministria e Shëndetësisë ka ndërmarrë hapin e radhës që penalizon të siguruarit. Për këta të fundit, deri në 31 mars vizitat te mjeku okulist dhe otorinolaringologu kishin zero kosto. Ndërsa prej datës 1 shkurt të këtij viti, edhe për ata që nuk janë në skemën e sigurimeve, këto vizita nga 1500 lekë që ishin, u reduktuan në masën 100 lekë. Por nuk vonoi shumë.
Politika e shtrëngimit ishte më e afërt nga ç’mund të mendohej. Një shkresë e firmosur nga ministri Beqaj urdhëron poliklinikat e specialiteteve që të faturojnë tarifat prej 1500 lekësh për dy kontrollet e sipërpërmendura, nëse ato janë për qëllime patente apo leje të përdorimit të armëve, pavarësisht të qenit apo jo pjesë e skemës së sigurimeve shoqërore. Më herët mandatpagesa e aplikimeve për patentë kapte vlerën e 1000 lekëve, por me vendosjen e këtyre dy tarifave të reja, qytetarëve do t’u duhet të paguajnë në total 4 000 lekë për t’u regjistruar në kursin e patentës.
Ministria e Shëndetësisë e ka argumentuar këtë me faktin që nuk bëhet fjalë për kontrolle që i shërbejnë parametrave shëndetësorë, por për raporte që lëshohen për qëllime dytësore, konkretisht për leje qarkullimi dhe leje përdorimi të armëve.
TË PASIGURUARIT
Në fillim të muajit shkurt, qeveria mori një vendim të rëndësishëm për të pasiguruarit. Krahas vizitave falas te mjeku i familjes, kjo kategori ka mundësi që prej muaji shkurt të paguajë me çmime të reduktuara edhe kontrollet te specialisti. Kjo ndodh nëse ndiqet sistemi i referimit, pra merret rekomandim nga mjeku i qendrës shëndetësore dhe stacioni i radhës është vizita te specialisti. Përgjysmim të çmimeve ka pësuar edhe pjesa më e madhe e tarifave të ekzaminimeve radiologjike dhe ato imunologjike. Kështu, ekografia nga 1000 mijë që ka qenë, është bërë 200 lekë. Po ashtu, kryerja e biopsive të të gjitha llojeve është ulur nga 3000 lekë në 500 lekë. Për sa u takon të siguruarve, ata mjaftojnë të paraqesin librezën e shëndetit dhe kartën e identitetit dhe të gjitha këto shërbime do t’u ofrohen falas. /Panorama/