Rikthimi i ish kryeministrit Fatos Nano në gjirin e Partisë Socialiste duket se ka trembur disa veteranë të kësaj force politike. Pak ditë më parë, kryeministri Edi Rama deklaroi se ka marrë një SMS miqësore nga ish-kryetari i PS, Fatos Nano dhe kjo ka zgjuar spekulimet se Nano do i rikthehet dhe njëherë garës për kryetar të shtetit.
Profesori i socialistëve, Servet Pëllumbi thotë për ‘Sot’ se ai është kundër rikthimit të Nanos në garën për president.
“Unë nuk e di nëse Nano ka vendosur të rikthehet në PS, por unë jam kundër rikthimit të tij në politikë dhe në PS”.
“Ka me dhjetëra e më shumë figura në PS, qoftë edhe për president. Unë nuk shoh se ka boshllëk në PS, qoftë në drejtimin e saj, qoftë në figura për president,” tha deputeti Namik Kopliku.
Edhe deputeti Fatmir Toçi është kundër rikthimit të Nanos.
Por deputeti i Korçës, Ylli Ziçishti shprehet pro rikthimit të Nanos, madje edhe në postin e presidentit.
