Ish-zyrtari i CIA-s, Doug Laux, në një intervistë ekskluzive për NBC News, ka thënë se presidenti i Shteteve të Bashkuara të Amerikës, Barack Obama, ka refuzuar zbatimin e një plani që CIA kishte përgatitur për ta rrëzuar nga pushteti presidentin sirian, Bashar Al-Assad, dhe për të mbështetur kryengritësit sirianë.
Ai ka thënë se kjo iniciativë ishte mbështetur nga vendimmarrësit kryesorë në Washington, përfshirë edhe shefin atëhershëm të CIA-s, David Petraeusin, Hillary Clintonin që ka shërbyer si sekretare e Shtetit dhe sekretarin e Mbrojtjes në atë kohë, Leon Panetta.
Por, sipas Laux, ishte Obama ai që kishte refuzuar zbatimin e këtij plani, pasi që ai nuk ishte i bindur se plani do të rezultojë i suksesshëm, shkruan KosovaPress.
Disa në Washington besojnë se po të vihej në zbatim ky plan, do të ndalej gjakderdhja në Siri, do të ndërpritej zgjerimi i vazhdueshëm i DAESH-it dhe do ta shpëtonte Evropën nga sulmet e paprecedenta terroriste dhe turmat e refugjatëve.
Por, Laux është shprehur i dyshimtë: “Mendoj se kjo gjë është e pamundur të parashikohet”, ka thënë ai.
(Boldnews)
