Sipas ligjit “për armët”, policia ka bërë thirrje të gjithë zyrtarëve që të dorëzojnë armët për shkak detyre edhe pse sipas ligjit të vjetër ishin me leje. Nga 350 armë që posedojnë zyrtarët vetëm 168 janë dorëzuar. Ndërkohë ngelen pa u dorëzuar 182 armë. Sipas policisë, më problematikë për të dorëzuar armët janë prokurorët dhe gjyqtarët.
Zyrtarët të cilët kanë patur armë me leje sipas ligjit të vjetër janë Prokurorë, Gjyqtarë, Deputetë, Kryetar Bashkie, Ish Kryetar Komunash, Policia Pyjore, Hetimi Tatimore, Përmbarues Gjyqësor etj.
Drejtoria e Përgjithshme për Sigurinë Publike i ka dërguar Letër – porosi strukturave vendore të Policisë së Shtetit që në shkurt të këtij viti , Për masat që duhet të merren dhe procedurat që duhen ndjekur nga strukturat vendore të policisë, për zbatimin e ligjit “Për Armët”.
Nga strukturat vendore të Policisë janë njoftuar zyrtarisht me shkrim personat të cilët janë pajisur me armë sipas ligjit të vjetër, për dorëzimin e armëve.
Nga të dhënat që disponon Policia e Shtetit, institucionet më problematike në dorëzimin e armëve të zjarrit janë kategoria Gjykatë/Prokurori. Procesi i grumbullimit të armëve të dhëna me leje, sipas legjislacionit të shfuqizuar, po vazhdon me intensitet nga Komisariatet dhe Drejtoritë Vendore të Policisë.
