Konsumatorët zviceranë iu qëndrojnë besnikë markave të tyre të preferuara edhe në kohë të vështira. Pavarësisht skandaleve që po e përcjellin, ata i besojnë Volkswagenit.
Afera me ndotjen si duket nuk e ka dëmtuar Volkswagenin në sytë e konsumatorit zviceran, sipas një anketimi të «Reader’s Digest», transmeton «20 Minuten». Ajo është makina më e besueshme te Zviceranët. Një vit më parë ishte Toyota, citon dialogplus.
Një markë tjetër e besuar te konsumatorët zviceranë është Nivea, e koncernit gjerman Beiersdorf. Ajo është prej kohësh produkti më i preferuar nga fusha e kozmetikës. Ndonëse shumë të besuara janë dhe markat zvicerane.
Për sa u përket bankave, sikurse vitin e kaluar, edhe sivjet prinë Raiffeisen. Te sigurimet më së shumti besueshmëri gëzon shoqëria Mobiliar, te bonbonat – Ricola, te dyshekët – Bico, te pompat e benzinës – Coop, te maqinat e amvisërisë – V-Zug, për tetevizion, internet dhe telefoni – Swisscomi. Marka më e besueshme e konsumatorit zviceran për veshmbathje këtë vit është H&M, e cila e ka spostuar në vendin e dytë markën tradicionale zvicerane Charles Vögele.
Si për të rinjtë, ashtu edhe për më të moshuarit. «Reader’s Digest» e zhvillon këtë hulumtim besueshmërie të markave që nga viti 2001 në vende të ndryshme të botës. Për studimin në Zvicër janë intervistuar 1800 veta. Anketimi bëhet pa propozime, të intervistuarit i japin vetë emrat e markave që iu besojnë më së shumti.
