Nga Boldnews.al
Prej disa orësh, Policia e Shtetit, po shpërndan “jo zyrtarisht” në media se po parashikon të arrestojë deputetin Gent Strazimiri, i cili, sipas uniformave blu, ka qenë i pajisur me armë pa leje në përplasjen e dhunshme ndërmjet forcave speciale dhe protestuesve në zonën e Liqenit Artificial, të Hënën, në datë 28 Mars 2016.
Mesa duket, kjo është një mënyrë efikase për të shmangur vëmendjen e opinionit publik nga problemi real i kësaj proteste, e organizuar prej javësh nga Shoqëria Civile dhe e mbështetur së fundmi edhe nga opozita e djathtë.
Policia është shprehur në media “jo zyrtarisht” se po sheh mundësitë ligjore për arrestimin e deputetit Strazimiri për “mbajtje pa leje të armëve luftarake”. Sipas po këtyre burimeve, në bazë të ligjit të ri “Për armët”, deputeti nuk duhet të ketë armë. Për këtë arsye, burimet “jo zyrtare” nga Ministria e Brendshme shprehen për median kryesore se po shqyrtojnë mundësinë për t’i kërkuar Prokurorisë së Përgjithshme autorizimin për arrestimin në flagrancë të deputetit Strazimiri. (http://top-channel.tv/lajme/artikull.php?id=322843&rel0).
“Boldnews.al” kontaktoi me burime zyrtare të Policisë së Shtetit, të cilët nuk pranuan të komentojnë mbi këtë çështje. Ndërsa, për juristët, situata është lehtësisht e qartë se, në bazë të atyre çfarë janë publikuar deri më tani, nuk mund të ngarkohet me përgjegjësi penale deputeti.
Për juristët, Policia e Shtetit, në rastet e flagrancës, duhet të veprojë menjëherë dhe nuk ka arsye të kërkojë autorizimin e organit të Prokurorisë për të realizuar arrestimet. Kushtetuta e Republikës së Shqipërisë, në nenin 73/3 parashikon rastet e arrestimit të deputetëve. E njëjta praktikë u zbatua pak muaj më parë, me arrestimin në flagrancë të deputetit Armando Prenga.
Gjithashtu, Policia nuk mund t’i sugjerojë Prokurorisë për të kërkuar nga Kuvendi i Shqipërisë heqjen e mandatit të deputetit. Sipas ndryshimeve kushtetuese të vitit 2012, deputetët nuk kanë imunitetit për rastet e ndjekjes penale.
Sa i përket rastit konkret, Policia ka për detyrë të provojë që objekti që mbante në brez deputeti Strazimiri është pistoletë. Po ashtu, për të realizuar arrestimin në flagrancë, duhet që arma e supozuar se ka qenë në posedim të deputetit, t’i kapej në momentin e ngjarjes. Pra, sa më sipër, juridikisht kanë humbur arsyet e flagrancës, pasi forcat policore, pavarësisht se në numër shumë të madh gjatë protestës, nuk kanë siguruar provat e mjaftueshme për të fiksuar në vend faktin që deputeti Strazimir ka qenë i pajisur me pistoletë.
Nga ana tjetër, burimet “jo zyrtare” të Policisë shprehen se arma që ka pasur deputeti Strazimiri (duke e konsideruar të mirëqenë që objekti në zotërim të deputetit ka qenë pistoletë), është pa leje. Këtë përfundim e mbështesin në një shkresë të Komisariatit nr.3 të Policisë së Tiranës, që mban datën 17 Mars 2016, drejtuar deputetit Gent Strazimiri, në të cilën i kërkohet që të dorëzojë armën me leje brenda datës 25 Mars 2016. Sipas shkresës së Policisë, në bazë të ndryshimeve të ligjit “Për Armët”, deputetët nuk e kanë më të drejtën të pajisjen me armë.
Këtu nis edhe zanafilla e angazhimit të “burimeve jo zyrtare” të Policisë për arrestimin e mundshëm të deputetit Strazimiri. Ai ishte në protestën e datës 28 Mars, i pajisur me një objekt që duket si pistoletë, ndërkohë që duhej ta kishte dorëzuar 3 ditë më parë, në datë 25. Pra, deputeti, për burimet “jo zyrtare” të Policisë së Shtetit duhet të arrestohet për “mbajtje pa leje të armëve luftarake”.
Nga ana tjetër, Partia Demokratike, nëpërmjet Sekretarit të Përgjithshëm, Arben Ristani, ka thënë që pajisja në brezin e deputetit Strazimiri ishte një këllëf telefoni celular dhe nuk ka qenë pistoletë.
Po ashtu, deputeti Strazimiri është shprehur në media se ai nuk ka marrë shkresë nga Policia e Shtetit për dorëzimin e armës, pasi kohët e fundit ka qenë në Shtetet e Bashkuara të Amerikës.
Pra, edhe nëse pranohet fakti që deputeti ka pasur armë gjatë protestës, duhet konfirmuar nëse ai ka marrë zyrtarisht dijeni për faktin që duhet të dorëzonte pistoletën, të cilën deri në atë moment e kishte në zotërim me lejen e autoriteteve përkatëse.
