Deputeti demokrat Edi Paloka e cilësoi të paligjshëm shoqërimin e ish deputetit Ndriçim Babasi. Sipas tij, Babasi është rrëmbyer forcërish nga policë të maskuar teksa ishte në një klub me disa persona të tjerë.
“Ne kemi edhe pamjet filmike, se si janë rrëmbyer nga njerëz me maska, se nuk mund të jetë policia ajo që rrëmben qytetarët nëpër klube. Janë rrëmbyer dhe janë sjellë në polici mes tyre edhe ish-deputeti Ndriçim Babasi. Momentalisht janë në Drejtorinë e Policisë. Janë marrë në mënyrë shtazarake. Kreu i PD-së është këtu, jemi të paktën 10 deputetë, duam të dimë gjendjen e tyre shëndetësore. Me ç’të drejtë janë ndaluar, kur protesta është e drejtë e qytetarëve. Këtu duhet të ishte Edi Rama, Erion Veliaj. Na thonë prisni drejtorin, i cili është fshehur se di se ku. Nuk ka pse të presim drejtorin, duam të shohim të shoqëruarit. Duam t’i shohim sepse sipas informacioneve tona janë keqtrajtuar dhe ne kemi detyrën të interesohemi për ta. Ne do hyjmë, përndryshe këtu do të mblidhet gjithë PD-ja dhe pastaj të hidhen përpjetë.”– deklaroi Paloka.
Ndërkohë deputeti Keltis Kruja denoncoi shoqërimin e protestuesve që kundërshtojnë Parkun e Lojërave tek Liqeni Artificial.
“Janë shoqëruar në mënyrë barbare, nga kriminelë me maska, protestues të pafajshëm. Duhet të shohim gjendjen e tyre shëndetësore. Situatë e pakuptimtë, drejtori do 1 orë 30 minuta të vijë në zyrë. Kryeministri e ministri, ortakë të kriminelëve, kundër qytetarëve të Tiranës.” – u shpreh Kruja.
