Një histori e tmerrshme e bërë publike nga goja e vetë viktimës këto ditë, ka tronditur gjithë Amerikën. Një histori që e ka zanafillën në vitin 1996, kur viktima u largua nga shtëpia dhe vitet që ndoqën më pas, ishin mbushur plot dhimbje.
Tanya është sot 31 vjeçe, por ajo ka përjetuar momente të tmerrshme për plot 10 vjet, kur ra në duart e Thomas Hose. Këtë dekadë të vështirë u përpoq të përshkruante gjatë intervistës që dha për kanalin televiziv CBS.
Thomas Hose ishte roja i shkollës ku shkonte Tanya në Pensilvani (SHBA). Ai shfrytëzoi momentet e vështira që po kalonte kjo nxënëse (14 vjeçe atëherë), për t’iu afruar. Prindërit e saj ishin ndarë, nëna e Tanya-s ishte zhdukur ndërsa i ati sillej sikur të mos kishte vajzë. Këtë pasiguri të saj përdori Hose. Iu afrua si shok dhe i fliste butë, me qëllim që të ndjehej e sigurt me të.
Tmerri i Tanyas filloi kur Thomas e bindi të braktiste shtëpinë e saj dhe të shkonte të jetonte me të. Tanya u bind dhe ai e mbylli për plot 10 vjet brenda një dhome. Në dhomë ai vendosi një kuti ku të kryente nevojat personale dhe e detyroi të bënte seks me të. Sa herë që ftonte miq në shtëpi, e mbyllte në dollap.
Me kalimin e viteve, vajza filloi ta bindte që ta linte të dilte pak në oborrin e shtëpisë, ndërsa ai e kërcënonte se nëse do të tentonte të arratisej, do ta vriste. Si përfundim, vajza e re zuri miqësi me një komshi, i cili i telefonoi policisë dhe Thomas u arrestua.
Tanya Kach akoma përpiqet që të lërë pas momentet tragjike që përjetoi. Eksperiencën e dhunshme që përjetoi, ajo vendosi ta bëjë libër.
Aty përshkruan momentet tragjike të 10 viteve të saj, që i kaloi në një dhomë në katin e dytë. Ajo lejohej të zbriste poshtë për të bërë dush vetëm një herë në javë.
Shumicën e kohës ajo hante krem fistikësh dhe sanduiçe. Fillimisht kujtonte sikur ishte e dashuruar me Hose dhe mendonte se kështu janë sakrificat në dashuri, por më vonë gjithçka po i bëhej më e qartë. E kuptoi që po torturohej.
Tortura më e madhe ishte gjatë festave, të cilat i kalonte e mbyllur në një dollap në katin e dytë të shtëpisë së Thomas Hose.
“Shpeshherë mendja më shkonte tek familja ime. Vallë më kujtonin ndonjëherë?”, thotë ajo.
Thomas e detyroi Kach të ndryshonte ngjyrën e flokëve dhe i vuri pseudonimin Nikki. “E ndjeja veten si qen, tha ajo. Plotësoja të gjitha urdhrat e padronit tim. Kur më urdhëronte, mbyllesha në dollap”.
Pasi u njoftua policia, u mësua se ajo kishte plot 10 vjet që kërkohej, që nga dita e zhdukjes së saj. Thomas Hose, tashmë 53 vjeç, u dënua me 15 vjet burg, pasi u shpall fajtor për kryerje marrëdhëniesh seksuale me minorene.
Ai ka bërë kërkesë për falje, e cila do të shqyrtohet në shkurt 2012. Kach tha: “Ai është një mostër absolute. Nuk gjej dot fjalë të tjera për ta përshkruar. Ai abuzonte mbi mua, duke më mbajtur për plot 10 vjet si skllave seksuale”.
(Boldnews)
