Gainluigi Buffon është portieri me rekordin më të gjatë të pathyeshmërisë në kampionatin italian.
Në minutën e katërt të derbit Torino-Juventus, numri një i bardhezinjve, ka kaluar 930 minutat pa pësuar asnjë gol në Serinë A, duke thyer në këtë mënyrë rekordin e Sebastiano Rossi, i cili ka kaluar 929 minuta pa pësuar gol në sezonin 1993/94 kur luante me Milan. Pathyeshmëria e Buffon ka zgjatur deri në minutën e 48-të të pjesës së dytë (973’ në total) kur Belotti ka realizuar me penallti për torinezët.
Tifozët bardhezi e kanë nderuar Buffon me mesazhin: “+929. Gigi numri 1, legjenda”. Arritja e portierit është pritur me duartrokitje, por nuk kanë munguar edhe vërshëllimat e disa tifozëve të Torino-s. Lojtarët bardhezi festojnë fitoren e arritur në derbi Për sa i takon ndeshjes, Juventus duket se e ka harruar shumë shpejt eliminimin e pësuar në Champions League kundër Bayern Munich në kohën shtesë.
Kampionët në fuqi të Italisë, të cilët nuk humbasin prej 15 ndeshjesh në kampionat, kanë regjistruar fitoren e katërt radhazi në Serinë A dhe kanë shkuar gjashtë pikë larg Napoli-t, që do të luajë pas një ore me Genoa-n. Torino ka rezistuar deri në minutën e 33-të të pjesës së parë kur Paul Pogba ka treguar edhe një herë klasin e tij duke zhbllokuar rezultatin me një goditje dënimi të jashtëzakonshme. Momenti kur Maxi Lopez realizoi golin e barazimit për Torino, i anuluar më pas nga arbitri.
Nëntë minuta më vonë Khedira ka dyfishuar avantazhin e miqve dhe ka realizuar, ndoshta, golin më të lehtë të karrierës së tij pasi është lënë, në mënyrë të pashpjegueshme, i lirë të futet në zonë nga mbrojtësit e Torinos para se të mposhte me lehtësi portierin Padelli. Siç thamë edhe më sipër, Torino ka ngushtuar diferencat në minutën e 48-të të pjesës së dytë me Belotti-n pas një penalltie të shkaktuar nga Bonucci. Një gol ky që i ka dhënë zemër vendasve, të cilët kanë realizuar edhe golin e barazimit në minutën e 59-të me Maxi Lopez, por që është anuluar gabimisht nga arbitri.
Ndeshja është mbyllur përfundimisht në minutën e 63-të kur Alavaro Morata ka realizuar golin e tretë të bardhezinjve pas një asisti të Paul Pogba. Një tjetër kombinim i kësaj dysheje ka sjellë edhe golin e katërt dhe të fundit të Juventus në minutën e 77-të, me francezin që ka qenë përsëri në rolin pasuesit dhe spanjollin në atë të finalizuesit. Në minutën e 87-të miqtë kanë mbetur me dhjetë lojtarë pas kartonit të kuq të marrë nga Khedira. Kjo është hera e dytë që Torino ka pësuar katër gola në këtë sezon, në të dy ndeshjet kundërshtari ka qenë Juventus. Lajmi i vetëm i keq për ekipin e Allegri-t është se goli i pësuar sot i ka dhënë fund pathyeshmërisë së bardhezinjve, që nuk pësonin një gol në kampionat prej 10 ndeshjesh.
Torino-Juventus 1-4
Shënues: Belotti 48’ (p)/Pogba 33’, Khedira 42’, Morata 63’, 77’
Torino: Padelli, Maksimovic, Glik, Moretti, Peres, Acquah, Vives, Benassi (Baselli 81’), Silva, Immobile (Lopez 46’), Belotti. Trajner: Ventura.
Juventus: Buffon, Rugani, Bonucci, Barzagli, Lichtsteiner (Cuadrado 63’), Lemina, Khedira, Pogba, Sandro, Dybala (Moratta 32’), Mandzukic (Zaza 85’). Trajner: Allegri.
Gjyqtar: Rizzoli
Kartonë të verdhë: Acquah, Glik, Silva, Belotti/Alex Sandro, Lichtsteiner, Bonucci
Karton i kuq: Khedira
