Pas vendimit të referendumit për kryetarin e Partisë Socialiste, Ben Blushi doli para mediave për të shfryrë të gjitha absurditetet e referendumit dhe leximit të statutit.
Blushi tha se ky referendum është nul, pasi nuk mund të ketë referendum për person por për çështje. Ai e cilësoi vendimin e kongresit si uzurpim të partisë nga një person i vetëm.
“Ishte një mundësi për të bërë zgjedhje pa kandidat. Kjo shpikje referendare ka arritur vetëm një gjë që Rama të zgjidhet para Edi Ramës. Kjo ndodhi sot. Akoma ne nuk e dimë kush është pyetja, Rama përveçse vendosi të garojë përballë vetes e konsideroi vetëm çështje, u kthye në pikpyetje.
Është sanksionim i një praktike 3-vjeçare i shkrirjes së PS-së, uzurpimit të saj, mënyrë amatore për ta kthyer në një trupë të vetme amorfe. Referendumet nuk zëvendësojnë zgjedhjet. Nëse referendumet do zëvendësonin zgjedhjet do kishte vetëm referendum.
Nuk mund ta pranoj këtë mënyrë eleminimi të kandidatëve. Unë nuk paragjykoj vendimin e referendumit por e quaj nul.
Unë jam kundër referendumit në parim dhe nuk mund të them nëse do të bëj fushatë kur ende nuk ka një pyetje. Kush do ta vendosi pyetjen. Nëse kongresi e pranon referendumin do të kishte disa pyetje. Referendumi në parim është nul”, deklaroi Blushi.
