“Letër një socialisti”, ky është libri që sapo ka dalë në treg nga Ben Blushi, në të cilin deputeti ka shprehur 10 masat konkrete se si vendi mund të dalë nga kriza në të cilën ndodhet. Në këtë libër Blushi prezanton platformën e tij të qeverisjes si kandidat për kryeministër në Kongresin e PS. Shpenzim, Konsum dhe prodhim, këto janë tre shtyllat kryesore ku mbështetet zhvillimi ekonomik i vendit.
Ja cilat janë propozimet e tij si kryeministër:
Në pikën e parë të platformës së tij të quajtur “Shqipëria bëhet”, Blushi propozon një paketë dinjiteti për të varfrit, sipas së cilës shteti duhet të marrë në mbrojtje rreth 100 mijë familje, pjesëtarët e së cilave jetojnë me më pak se 40 dollarë në muaj.
Ai propozon dyfishimin e ndihmës ekonomike në jo më pak se 10 mijë lekë të rinj në muaj dhe furnizimin falas me energji të tyre. Në rritjen e të ardhurave, deputeti socialist propozon rritjen e pagës minimale me të paktën 50%, akt që do të rrisë konsumin dhe nivelin e jetesës për këtë kategori.
Sipas statistikave, Shqipëria është vendi me pagesën më të ulët për orë pune në rajon, nga 061.5 euro për orë, ndërsa Maqedonia e ka 3.3 euro dhe Bullgaria 3.7 euro. Ai del në konkluzionin se pagesat e ulëta të shqiptarëve nuk kanë ndikuar në rritjen e investimeve të huaja. Ben Blushi propozon një reformë të plotë të rritjes së pagave, deri në masën e 50% për katër vitet e ardhshme, 10% vitin e parë dhe të dytë, dhe 15% për dy vitet e tjera. Këtë rritje pagash Blushi e shoqëron me një politikë më të kujdesshme fiskale do të çonte në rritjen e konsumit.
Deputeti socialist ka zgjidhjet e tij edhe për shtimin e të ardhurave. Si paketën e dinjitetit, ashtu dhe rritjen e pagave, Blushi i sheh burimet e financimit tek miradministrimi financiar, si dhe efikasiteti i luftës kundër evazionit fiskal dhe informalitetit, nga të cilat buxheti mund të përfitonte deri në 57 miliardë lekë më shumë në vit. Lulëzimin e ekonomisë shqiptare dhe mirëqenies në vend Ben Blushi e sheh te mbështetja dhe fuqizimi i shtresës së mesme, tek e cila ka rënë e gjithë barra fiskale nga taksimi progresiv aktual.
Ai propozon që sistemi i taksimit progresiv të zbutet për shtresën e mesme që do ta dekurajonte emigrimin e saj, por dhe më shumë mundësi për shkollim e strehim. Duke e cilësuar jo të suksesshëm sistemin aktual të taksimit, që nuk ka krijuar më shumë barazi, Ben Blushi propozon sistem të ri taksimi progresiv, veçanërisht për biznesin dhe jo të ardhurat personale. “Të vendoset sistem i ri taksimi që rritet progresivisht mbi xhiron 20 milionë euro në vit dhe me radhë duke e çuar taksimin deri në 40%, që është nën normën europiane. Taksa progresive është zbatuar për të varfrit dhe punëtorët e jo për të pasurit, të cilët taksohen në mënyrë të sheshtë”, shkruan Blushi në librin e tij.
Rritjen e arsimimit të popullatës Blushi e sheh si masë që do të reduktojë varfërinë, korrupsionin dhe emigrimin. Ai kërkon që kuota e shpenzimeve për arsimin të jetë e detyrueshme në jo më pak se 5% të PPB. Cikli i mesëm, gjimnazi të jetë i detyrueshëm, ndërsa kërkon depolitizim të arsimit, duke e ndaluar me Kod Zgjedhor pjesëmarrjen e mësuesve në komisione zgjedhore. Administrimin e shkollës, Blushi kërkon të bëhet nga bashkitë dhe jo Ministria e Arsimit. Ai propozon edhe uljen e tarifave të shkollimit për universitetet publike, duke rritur nivelin e investimeve në to nga buxheti i shtetit.
