Gjyshja që u gjobit dje nga inspektorët e Bashkisë së Tiranës që shiste prasë në trotuar, bëri bujë nëpër rrjetet sociale dhe ngjalli një valë reagimi kundër kryebashkiakut Erion Veliaj.
Megjithatë, ky i fundit mori dje përsipër se do ta paguante ai gjobën që vendosën punonjësit e tij. Dje Bashkia e Tiranës publikoi një foto të gjobës që Erion Veliaj kishte paguar, ku emri i të moshuarës ishte Xhevrije Mici.
Por, emri i saj nuk merret vesh si është në të vërtetë. Kryetari i Bashkisë së Tiranës, Erion Veliaj ka nisur fushatën mediatike për të rregulluar disi reagimet e shumta që nisën kundër tij. Sot, Veliaj ka publikuar një fotografi në Facebook me gruan e moshuar që gjobiti dje, duke e puthur në faqe. Sipas postimit në Facebook të kryebashkiakut të Tiranës, sot e gjyshja me shami të bardhë e ka emrin Zyle.
“Me nënë Zylen në treg”, shkruan Veliaj në Facebook. Tani kryebashkiaku duhet të shpjegojë se si e ka emrin në të vërtetë e moshuara me shami të bardhë në kokë, Xhevrije Mici apo Zyle Lami.
Propoganda mediatike nuk po kursen as të moshuarit. Natyrshëm shtrohet pyetja: Në emër të kujt është paguar gjoba dje nëse e gjyshja quhet sot Zyle Lami?
