Prokurori i Përgjithshëm po shqyrton mundësitë për të rifreskuar stafin drejtues në disa nivele të Prokurorisë shqiptare. Këto ndryshime arsyetohen kryesisht nga nevoja për të përmirësuar rezultatet në ndjekjen penale, si edhe për shkak se prokurorë të ndryshëm kanë vite në pozicione të caktuara në nivel drejtuesish, zv.drejtuesish prokurorie, si në Prokurori Rrethi, ashtu edhe në Prokurori Apeli.
Mësohet se ndryshime rrënjësore do të ketë edhe në Prokurorinë e Përgjithshme. Burime nga Prokuroria sqarojnë se riorganizimi do të realizohet në disa faza, ku fillimisht po shqyrtohen mundësitë në ato njësi të Prokurorisë, në të cilat vlerësohet se ka nevojë për ndërhyrje në një kohë sa më të shpejtë.
Prokuroria e Përgjithshme, pas analizave vjetore të zhvilluara në fillim të vitit 2016, ka krijuar një pamje të qartë mbi problematikat e aktivitetit. Në përfundim, është vlerësuar si domosdoshmëri rifreskimi i një pjese të strukturës së Prokurorisë, proces i cili pritet të realizohet periodikisht në ditët dhe javët e ardhshme.
(Boldnews)
