Ish-ministri i Punës, Spiro Ksera, i cili ndodhet në ‘arrest me burg’ me akuzën për shpërdorim të detyrës dhe vjedhje, kërkon lirinë në Gjykatën e Lartë. Ksera përmes avokatit të tij Genci Gjokutaj, ka dorëzuar dje rekursin duke kërkuar ndryshimin e masës së sigurisë dhe lirimin e tij nga burgu.
Ksera e ka bazuar kërkesën e tij në pretendimin se arrestimi i tij është i paligjshëm dhe masa e arrestit në burg, është ekstreme, për shkak se nuk ekziston asnjë rrezik të largohet nga Shqipëria, të prishë provat e dosjes, apo të ndikojë në fatin e hetimit.
Gjykata e Lartë pritet të hedhë shortin dhe të përcaktojë trupin gjykues që do të shqyrtojë dosjen. Spiro Ksera, dyshohet për akuzën e vjedhjes nëpërmjet shpërdorimit të detyrës, në shumën e 30 milionë lekëve.
Sipas prokurorisë, ish-ministri në bashkëpunim me disa vartës ka firmosur tendera fiktivë, për kryerjen e disa aktiviteteve sociale, për komunitetin rom, shtresat në nevojë dhe fëmijët. Por, nga hetimet ka rezultuar se aktivitetet ose nuk janë zhvilluar fare, ose në dosje janë vënë dokumente fiktive.
(Boldnews)
