Gjykata e Tiranës ka dhënë sot vendimin “arrest me burg” për Lutfi Shabanin të njohur ndryshe edhe si Ben Çami. Masa e re e sigurisë është dhënë për qëllime ekstradimi drejt Italisë.
Ben Çami u arrestua pak ditë më parë për trafik të lëndëve narkotike. Ai është dënuar me 10 vite burg në shtetin italian, pasi akuzohet për trafik ndërkombëtar të lëndëve narkotike dhe pjesëmarrje në organizatë kriminale.
Shabani është arrestuar gjatë një operacioni të zhvilluar nga policia e Korçës në bashkëpunim me policinë e Durrësit, më 26 shkurt të këtij viti në pikën e kalimit kufitar të Kapshticës, ku u tentua të trafikoheshin 575 kg hashash drejt Greqisë.
Ministria e Punëve të Brendshme ka deklaruar sot se Lutfi Shabani, është në kërkim edhe nga drejtësia italiane, ndërsa pritet dhe ekstradimi i tij drejt shtetit fqinj.
“Në lidhje me Lutfi (Artan) Shabani, i njohur dhe si Ben Çami, i cili aktualisht është i arrestuar dhe ndodhet në burgun 313 në Tiranë, nën masën e sigurisë “arrest me burg”, për veprën penale “Trafikimi i lëndëve narkotike”, Policia e Durrësit njofton se: Ky shtetas është i kërkuar edhe nga organet e Drejtësisë Italiane, pasi është i dënuar në Itali me 10 vjet burgim, për veprën penale ‘Organizatë Kriminale për Trafikun e Lëndëve Narkotike’, parashikuar nga Kodi Penal Italian”, deklaron MPB.
Specialistët e Seksionit kundër Narkotikëve në Drejtorinë Vendore të Policisë Durrës, më datë 09.03.2016, në ambientet e burgut 313 Tiranë, i kanë komunikuar të ndaluarit Lutfi Shabani, Urdhër-arrestin ndërkombëtar të lëshuar nga Autoritetet Gjyqësore Italiane, për veprën penale ‘Pjesëmarrje në Organizatë Kriminale me qëllim trafikun e Lëndëve Narkotike’, parashikuar nga Kodi Penal Italian, pasi ky shtetas është i dënuar me 10 vjet burgim.
(Boldnews)
