Dy oficerë të Shërbimit Informativ Shtetëror janë shkakruar nga detyra pasi në telefonat e tyre celularë u gjetën të fotografuara informacione dhe dokumente sekrete. Arrestimi i inspektorit Florian Bushi i cili i kishte dërguar përgjime sekrete një të dyshuari si vrasës me pagesë ka shkakuar tërmet tek institucioni më i rëndësishëm i sigurisë në vend. Pas kësaj ngjarje, kontrolli i brendshëm ka nisur një inspektim tek të gjithë punonjësit e dyshuar për veprimtari të paligjshme. Kontrolli ka zbuluar edhe të paktën dy oficerë të tjerë që kishin të fotografuar në telefonat e tyre të dhëna që konsiderohen sekrete.
Gjithçka ka nisur pas një urdhëri të kreut të SHISH, Vishi Ajazi Lika për ndalimin e telefonave celularë në ambjentet e punës. Por duket se ky urdhër nuk është zbatuar nga të gjithë punonjësit, pasi disa prej tyre nuk i kanë dorëzuar telefonat në hyrje të SHISH, duke hedhur dyshime të forta për veprimtarinë e tyre. Masat kontrollit u intensifikuan edhe më shumë, kur me urdhër të Prokurorisë së Krimeve të Rënda u arrestua inspektori Florian Bushi. Ai rezulton se i kishte dërguar pjesë përgjimesh shtetasit Ilir Memushaj, i dyshuar si një nga pjesëmarrësit në atentatin ku mbeti i vrarë Denis Kasa në hyrje të qytetit të Fierit. Kjo vrasje u zbardh nga policia dhe prokuroria, ndërsa në telefonin e Memushajt u gjetën fotografi përgjimesh të dërguara nga inspektori i SHISH, Florian Bushi.
Por ky rast nuk ka qenë i vetmi në Shërbimin Informativ, pasi në prokurori janë dërguar për hetim edhe dy inspektorë të tjerë, të cilët gjithashtu kishin të fotografuar me telefonat e tyre celularë materiale sekrete. Ende nuk ka prova se këto të dhëna mund të jenë përdorur prej tyre, por SHISH kërkon hetimin e dy inspektorëve. Për dy të dyshuarit është marrë masa e shkarkimit nda detyra, ndërsa çështja pritet të merret në hetim nga Prokuroria e Tiranës. Zhvillimet e fundit brenda instituconit më të rëndësishëm të sigurissë në vend, hedhin dyshime të forta për menyrën e drejtimit dhe organizimit të punës së SHISH.
