Policia e Fierit ka vënë në pranga biznesmenin e shumëpërfolur Fatmir Kajolli, duke njohur kështu vendimin e autoriteteve italiane që e kanë dënuar me 22 vite burg në këtë shtet për trafikim të lëndëve narkotike dhe pjesëmarrje në organizatë kriminale.
Pas kërkeses se organit te akuzes ne Fier, Gjykata e ketij rrethi ka dhene masen e sigurimit “arrest me burg” per Kajollin per efekt te njohjes se vendimit penal te huaj, vendim që është ekzekutuar menjëherë nga blutë e Fierit.
Më herët Kajolli pati një proces ekstradimi në Shqipëri, por nuk u ekzekutua. Me këtë vendim të Gjykatës së Fierit, bëhet njohja e vendimit të Gjykatës italiane duke njohur kështu dënimin që ka marrë në vendin fqinj me 22 vite heqje lirie.
Tashmë Kajolli, emër shumë i lakuar nga policia do të vuajë dënimin për veprat penale që akuzohet nga Italia, në Shqipëri. Në kuadër të këtyre hetimeve dhe akuzave, atij iu sekuestruan më herët pronat që sipas policisë i kishte vendosur nga aktiviteti i tij kriminal.
Po kështu Kajolli është vënë në qendër të kronikave për dhunën e ushtruar ndaj një numëruesi të PS-së në zgjedhjet e kaluara për pushtetin vendor në Fier, ngjarje për të cilën u shpall në kërkim bashkë me dy djemtë e tij. Kajolli ka qenë gjithashtu këshilltar në Këshillin Bashkiak të Fierit si përfaqësues i Partisë Republikane dhe njihej si njeri i afërt i Mediut.
(Boldnews)
