Analisti Fatos Lubonja ka parë nga afër gjendjen e të ndaluarve nga policia pas protestës së sotme tek Liqeni si dhe shokët e tyre që presin jashtë Komisariati numër 1 në Tiranë. Pas vizitës, Lubonja ka deklaruar se shteti duhet të akuzojë kryebashkiakun Erion Veliaj se po ndërton pa leje.
Madje ai i kërkoi kreut të LSI-së, Ilir Meta që të shprehë publikisht qëndrimin e tij mbi këtë çështje duke theksuar se ministri i Mjedisit, Lefter Koka që i përket forcës së tij politike nuk ka dhënë leje mjedisore për projektin e Bashkisë së Tiranës.
“Gjëja e parë që më tmerroi ishte se atje kishte më shumë policë se protestues. Atje është një akt i paligjshëm dhe policia duhet të mbrojë ata që mbrojnë parkun. Shteti duhet të akuzojë bashkinë se po punohet pa leje. Klientelizmi, megalomania dhe injoranca janë bashkuar bashkë”, tha Lubonja.
Protestuesit e shoqërisë civile të ndaluar sot nga policia janë vizituar edhe nga deputeti i Partise Demokratike Arben Ristani, Flamur Noka dhe kreu i këshilltarëve të djathtë në Këshillin Bashkiak Leonard Olli.
(Boldnews)
