Këngëtarja britanike Duffy, mori një famë të madhe të menjëhershme në fund të viteve 2000 duke publikuar disa hite të pavdekshme. Mirëpo, pak kohë më pas ajo u zhduk pa lënë gjurmë dhe i ka munguar skenës prej më shumë se një dekade.
Së fundmi, këngëtarja ka treguar se është rrëmbyer dhe përdhunuar, dhe i është dashur të bëjë një rrugë të gjatë drejt shërimit nga trauma.
“Ishte ditëlindja ime, u drogova në një restorant, më pas u drogova për katër javë dhe udhëtova në një vend të huaj. Nuk ndihesha e sigurt të shkoja në polici. Ndjeva se nëse diçka shkon keq, unë do të isha e vdekur dhe ai do të më kishte vrarë. Nuk mund të rrezikoja që lajmi të përhapej në media. Më duhej vërtet të ndiqja instinktet që kisha.”
Ajo arriti të arratisej, por jetoi e izoluar për vite me radhë dhe, më në fund, shkoi në polici.
“Identiteti i përdhunuesit duhet të trajtohet vetëm nga policia… dhe kjo është mes meje dhe atyre” -shprehet Duffy.
Duffy thotë se në një moment kishte menduar të ndryshonte emrin e saj për t’u zhdukur në një vend tjetër, ku të fillonte një jetë të re dhe të bënte punë të çfarëdoshme, në mënyrë që të mund ta linte pas të kaluarën.
Trauma e kësaj përvoje depërtoi edhe në marrëdhëniet e saj romantike, tregon ajo.
Sa i përket një rikthimi të mundshëm në muzikë, Duffy shprehet optimiste, por pa plane konkrete.
