Deputeti i Partisë Demokratike, Gazment Bardhi ka shkëmbyer replika me ministren e Shtetit për Marrëdhëniet me Parlamentin, Elisa Spiropali në Kuvend.
Ministrja Spiropali iu drejtua deputetit të PD si “hije”, i humbur dhe gara që kanë me njëri-tjetrin në PD është për të qeshur.
“Gazi u ndje i detyruar të ngrihej dhe të fliste sepse ju dëgjua sikur unë e përmenda 10 herë, në fakt ai dëgjoi jehonën e zërit tim sepse atë nuk e përmendiin më as në partinë e tij. Ç´punë kam unë me hijen e tij, të mbetur pas në dyert e PD. Me garë pa garë, me vota pa vota Gaz i dashur ju jeni të humbur dhe kaq është puna juaj. Se je në garë me Agronin apo ti, apo Agroni me Joridën apo Jorida me ty, kjo i bën për të qeshur të gjithë sepse për të qarë i bënit në kohë kur qeverisnit”, tha Spiropali.
Ndërsa Bardhi u përgjigj duke thënë se Spiropali ka përfituar 5 milionë lekë fonde publike kur ka drejtuar Doganën e Shqipërisë.
“Ky Kuvend kishte Madam 5 milionë euro dhe tani ka një Madam 5.5 milionë euro. Dhe në garë nuk jam unë me Agron Shehaj por ju me njëri-tjetrin”, tha Bardhi.
