Deputeti socialist Erion Braçe u përfshi sot në protestën e fermerëve kundër Qeverisë. Protesta u organizua nga fermerët e Çermës ditën e sotme, ndërsa mes tyre ishte edhe Erion Braçe, i cili deri para pak muajve mbante postin e zv.Kryeministrit në Qeverinv Rama.
Në një prononcim për mediat, Braçe thotë se çmimi i grurit ka rënë aq shumë saqë fermerët janë zhytur në faliment.
“Nga Velipoja deri poshtë në Ksamil, çfarë do të hanë njerëzit. Sepse i kemi thirrur njerëzit, u themi turistëve që të vijnë, por çfarë do të hanë. Nëse falimenton kjo ekonomi bujqësore, ka falimentuar ekonomia e të gjithë vendit. Ai shkon në emigracion dhe merr më shumë lekë”, tha Braçe.
Por në protestë fermerët e fshatit Çermë e Poshtme në Lushnje, dolën pasi kanë kultivuar rreth 100 hektarë me shalqi dhe prodhimi ka mbetur në fusha.
Braçe tha Ministria e Financave dhe ajo e Bujqësisë nuk kryejnë kontrolle në Divjakë e Lushnje ku grumbulluesit punojnë pa fatura.
“Shteti duhet të ndërtojë magazina dhe frigoriferë publik. Kështu fermeri çon mallin atje kur ka çmim të lartë”, tha ai.
