Nga Boldnews.al
Është anëtar i Këshillit Bashkiak të Tiranës, angjent doganor, kryepatronazhist i një blloku në Tiranë, ngritës dore për çdo nismë të Erion Veliajt dhe pak “trafikant” kokaine. I gjithë jetëshkrimi i pasur është për Egert Vargun, votuesin e çdo nisme të Veliajt, ku ky i fundit shpesh i cilëson si kolegë…
Vargu u arrestua pasi dyshohet se është përfshirë në trafikimin e 45.5 kilogramë kokainë të pastër që vinte nga Brazili me një ngarkesë me mish. Rilindja mishin ta ha, por kockën ta ruan… Pakot me kokainë kishin figurën e “Gokut”, një personazh të filmave vizatimorë ku disa prej tyre për propagandë Veliaj i stampon shpesh në bluzat e tij.
Në moçalin e qeverisjes, lokale dhe qëndrore, përfshirja e zyrtarëve të lartë, të emëruar dhe zgjedhur me trafik droge nuk janë raste të izoluara, por fenomen gjenetik që është përhapur si pandemi në radhët e zyrtarëve të shtetit, të çdo niveli qofshin. Para pak ditësh ish-kryebashkiaku i Vorës, Agim Kajmaku, u kap në Itali me 20 koligramë kokainë, që e kishte fshehur në vazot e luleve. Të tjerë zyrtarë të lartë, të zgjedhur apo emëruar, kanë kaluar në një stad tjetër: nga trafiku i kanabisit në atë të kokainës.
Përderisa kokaina është e bardhë, a quhet para e pisët ajo që vjen nga trafikimi i saj? Këtë përgjigje fort të zorshme duket se na e kanë shtjelluar kokat e mëdha të qeverisjes sonë. Trafikantëve po i japin poste shtetërore pasi kush më mirë se ata e njeh punën e trafikut të drogës dhe shpërndarjes së parave që vjen prej saj, duke i futur në lavatriçen e Rilindjes.
Skifterat e vilave nëpër Evropë bëhen drejtorë drejtorish. I tillë ishte edhe Drejtori i Ujësjellësit të Kurbinit i cili dyshohet nga policia spanjolle se ka grabitur disa vila, mes të cilëve edhe atë të futbollistit të Real Madritit, Karin Benzema. Po sikur të kishte grabitur shtëpinë e Mesit apo Ronaldos? Këtu ndryshon puna, një post më i lartë do gjendej për të, pse jo të ishte një kandidat lokal për drejtimin e bashkive. Provat janë dhënë. Qeveria ta jep hakun që meriton, sa më shumë i përfshirë në trafik droge, prostitucioni, apo grabitje me dhunë aq më lart në poste drejtuese.
Çështja është që policitë e vendeve të tjera bëjnë hetime, arrestime dhe lëshojnë urdhër-arreste për këdo që është i përfshirë në vendin e tyre me veprimtari kriminale. Këtë polici se blejnë dot, as nuk ia mbyllin sytë dhe kjo është një problem më vete për qeverinë tonë, atje nuk ka “Ardë Veli” që pasi punuan për qeverisjen hoqën uniformën e policisë së shtetit dhe vëshën kostumin e pushtetit.
Vaksinë për ta luftuar këtë “sëmundje” (trafikun e drogës) nuk ka, madje po tentohet që të shtrihet edhe më shumë kudo të munden, me qëllimin e “mirë” për të krijuar “imunitetin e tufës”. Atëherë do të kemi dalje pafund në media për të parashtruar këtë arritje të mëdhe, ku trafiku i drogës në Shqipëri u “luftua” duke e përhapur sa më shumë dhe ma masat e marra nga qeveria u krijua “imuniteti i tufës”…
