Nga Boldnews.al
Një tender me vlerë 4 milionë euro ka nxjerrë zbuluar Dritan Agollin e Fondit Shqiptar të Zhvillimit. Me këtë fond do të “rregullohen” rrugët e sapo bëra, apo që faktojnë se ato rrugë janë bërë “shkel e shko”.
Pra, një fond i majmë për të “mbuluar” skandalet me bërjen e rrugëve nga FSHZH, i cili ka tenderuar qindra milionë euro për disa segmente që janë shkatërruar në një hark kohor të shkurtër. Burime të Boldnews.al bëjnë me dije se, nga “frika” e ndonjë hetimi të mundshëm, Agolli hapi këtë procedurë pa specifikuar se cila rrugë do të ribëhet, apo do t’i vendoset makijazh. Por, nëse Tushe i Lushnjes u fut në burg për një kanal, po këta zyrtarë që shpenzojnë dhe rishpenzojnë qindra milionë euro, përse nuk hetohen!
Sipas dokumenteve që disponon Boldnews.al, FSHZH ka hapur tenderin me objekt “ndërhyrje për përmirësimin e strukturave dhe mbrojtjëve rrugore – paketa e rrëshqitjeve dhe mbrojteve”. Fondi limit i këtij tenderi është 416.666.666 lekë ose mbi 4 milionë euro. Pra, nisur edhe nga objekti, bëhet fjalë për rrëshqitje rrugësh. Por, për cilat rrugë?!
Boldnews.al shfletoi dokumentet e tenderit, në kërkim për të gjetur se në cilat rrugë do të bëhen ndërhyrje. Por, në asnjë radhë në dolumentet e publikuara nga FSHZH, nuk ka asnjë emër rrugë, por vetëm specifikime se çfarë ndërhyrjesh duhen bërë. Po ku?! Në dokumentet e Fondit thuhet se “paketa për mbrojtjen nga rrëshqitjet për akset rrugore” ka filluar pas shqetësimit të përfaqësuesve të Njësive të Qeverisjes Vendore (NjVV).
“Stafi i FSHZH ka bërë të mundur të bëjë verifikimin në terren të disa prej akseve rrugore, të cilat janë më problematike për qarkullimin e automjeteve për shkak të rrëshqitjeve të ndodhura në zona të lokalizuara” thuhet në dokumente. Pra, vetëm të lokalizuara dhe jo në cilat rrugë! Në dokumente thuhet se verifikimi në terren është bërë kryesisht në akset rrugore, të cilat janë të finacuara ndër vite nga FSHZH dhe që i shërbejnë zonave turistike dhe me potencial për zhvillimin e ekonomisë. Pra, bëhet fjalë për rrugët e “famshme” të FSHZH-së.
Më tej thuhet se pas rikonjicionit në terren të këtyre akseve rrugore është konstatuar se në disa zona të lokalizuara kanë ndodhur rrëshqitje.
Rrëshqitjet ndahen në tre tipe: E para ka rrëshqitje të skarpatave mbi trupin e rrugës (skarpata e sipërme), të cilat kanë zënë pjesërisht pjesën kaluese të rrugës dhe pengojnë qarkullimin normal të automjeteve. E dyta, rrëshqitje që kanë bërë ngushtimin e trasesë së rrugës. Dhe e treta, rrëshqitje që kanë bërë devijimjn e rrugës. “Nisur nga kjo situatë, parashikohet ndërhyrja për mbrojtjet nga rrëshqitjet në disa prej akseve rrugore, të cilat konsiderohen të rendësishme dhe me prioritet” thuhet në dokument, por në asnjë rast nuk shkruhet se në cilat rrugë.
