Kërcënime për bombë ka pasur te shkolla “Kralj Milutin” në Graçanicë. Mediumi serb “RTV Kim”, shkruan se mesazhin kërcënues e ka parë rreth orës shtatë të mëngjesit drejtori i shkollës, Vladimir Milkiç.
Ai ka shtuar se rastin e kanë denoncuar në polici teksa mësimet për nxënësit e shkollës fillore “Kralj Milutin” do të organizohen sot online. Në shkollë kanë mbërritur pjesëtarë të Policisë së Kosovës nga Graçanica, ndërsa priten edhe njësitë speciale nga Prishtina.
Në këtë objekt shkollor, përveç nxënësve të shkollave fillore, mësimin e ndjekin edhe nxënës të Shkollës së Trafikut dhe Parashkollor. Raportohet se mesazhet kanë mbërritur edhe në shkollat e Lapllasellës dhe Çagllavicës.
Sot edhe në disa shkolla në rajonin e Gjilanit është dhënë alarm për bomba. Kërcënime për bomba kanë pranuar shkollat e Novëbërdës, Kamenicës, Ranillugut dhe Kllokotit.
Rastin për Express e ka konfirmuar zëdhënësi i Policisë për Rajonin e Gjilani, Ismet Hashani. Hashani ka thënë se për momentin s’ka vend për panik.
“Ju njoftojmë se nga orët e hershme të mëngjesit të sotëm, Policia e Kosovës ka pranuar informacione nga përgjegjësit e disa shkollave të komunës së Novobërdës, Kamenicës Ranillugut , dhe Kllokotit se permes email adresave zyrtare të këtyre shkollave kanë pranuar informacione se ka të vendosura bomba ( mjet shperthyes).
Për momentin nuk ka vend për panik. Policia e Kosovës dhe njësitet e IEDD kanë dalë në vendin e ngjarjes dhe janë duke i hetuar rastet veç e veç”, ka thënë Hashani.
