Analisti Fatos Lubonja në studion e emisionit “Open” tha se për krizën e çmimeve në Shqipëri, Qeveria nuk mund të justifikohet me luftën në Ukrainë.
Lubonja tha se problemi është më i gjerë dhe problemet janë të shumta. “Ne jemi një trup i sëmurë, që nuk vdes nga pandemia, nëse do të bëjmë një paralelizëm, por nga 100 arsye të tjera”, tha Lubonja.
Ai tha se 20 % e të ardhurave ditore në Shqipëri shkojnë për të blerë 1 litër karburant dhe ta mendosh që kjo situatë ishte para luftës në Ukrainë.
“Ne jemi vendi me rrogat më të ulëta, por jemi kampion për rritjen e çmimeve. Kjo histori nuk lidhet me luftën, ka nisur shumë para luftës.
Këtu duhej të ishin krijuar disa standarde, disa shtresa dhjami nga kjo shoqëri, që të mund të përballonim këto situata lufte.
Ja po ju them, si është situata sot në spitalet publike? As letra higjenike nuk ka dhe ky nuk është një standart”, tha Lubonja.
Në debat me Besart Kadian, i cili e ndërpreu disa herë, Lubonja i tha “mos u bëj idiot i dobishëm”.
“Irani e ka inflacionin 40 %”, u shpreh Kadia, ndërsa Lubonja i përgjigj “nuk të thashë që Irani është mirë, por të thashë se burimet janë keqmenaxhuar”.
“Më ler të flas, unë po them se njerëzit sot dalin e protestojnë jo vetëm për çmimet, por për këtë krizë të përgjithshme”, tha Lubonja.
Kadia i tha se në Shqipëri nuk ka krizë, por vetëm rritje çmimesh.
“Ti po tallesh me publikun”, i tha Lubonja, duke shtuar “ju po bëni zhurmë, jo debat”.
