Analisti Fatos Lubonja, e ka cilësuar aksionin për lirimin e hapësirave publike si një “shou propagandistik” nga qeveria dhe që nuk prek problemet reale.
Lubonja theksoi gjatë një interviste televizive se shqetësimi më i madh është zaptimi dhe shkatërrimi i strukturave publike përmes ndërtimeve që cenojnë jetesën e qytetarëve.
Më tej ai tha se në bregdet po grabitet hapërisa publike pasi po ndërtohen resorte.
“Lirimi i hapësirave publike është aksion propagandistik. Po zhvillohet një show, që zgjat pak dhe problemi i dytë është diçka tjetër, është zaptimi e shkatërrimi i zonave publike. Këtu kam parasysh ato vende, që më parë kanë qenë zonë shtetërore apo private, ku prsh në një ndërtesë 1 kat që mund të jetë publike, bëhen privatizime dhe rikonstruktime, ku ngrihen gradaçela. Nuk është problemi se gradaçela ngrihet aty në mënyrë të paligjshme, por gradaçela zapton diellin, ajrin e të tjerëve, që duan të jetojnë.
Në Farkë ishte bërë një projekt dhe i aprovuar, se do ngrihen 17-18 gradaçela në atë zonë. Nuk e di nëse toka është pronë private apo publike apo e privatizuar, por ndërtimet aty do shkatërronin jetën përreth, gjelbërimin. Ashtu sikurse i merret bregdeti publikut nëpërmjet resorteve, se deti është publik. Ti mund të bësh resorte, por nuk mund të bllokosh vijën detare. Kemi parë që aty ku bëhen resorte, aty vihen karrige dhe aty nuk kalon më njeri. Kjo është grabitja kryesore që rrezikon vendi“, tha Lubonja në News24.
