Kryeministri Edi dhe homologu i Malit të Zi, Dritan Abazoviç, kanë mbajtur një konferencë të përbashkët me Presidentin ukrainas Zelensky, ku kanë folur lidhur me sfidat për anëtarësimin në BE dhe mbështetjen që vendet e Ballkanit i kanë dhënë Ukrainës.
Zelensky ka shkruar se Mali i Zi, Shqipëria dhe Maqedonia e Veriut mbështesnin Ukrainën për të marrë statusin e vendit kandidat për në BE, ndërsa shtoi se në këtë rrugë nuk ishin konkurrentë por bashkëpunëtorë.
“Shqipëria, Mali i Zi dhe Maqedonia e Veriut mbështesin ofrimin e shtetit tonë të statusit të kandidatit për anëtarësim në BE.
Në këtë rrugë europiane, vendet tona nuk janë konkurrente, por vetëm plotësojnë mundësi të njëri-tjetrit. Edi Rama dhe Dritan Abazović faleminderit për vizitën dhe bisedat produktive!”, shkruan Zelensky në facebook.
“I jam mirënjohës të gjithëve për miratimin e deklaratës sonë të përbashkët në mbështetje të dhënies Ukrainës statusin e kandidatit për në BE”, tha Zelensky në një konferencë shtypi në Kiev të mërkurën.
“Vendet tona duhet të jenë anëtarë të plotë të BE-së dhe ne jemi dakord që shtetet tona nuk janë rivalë në këtë rrugë evropiane. Ato vetëm përforcojnë mundësitë e njëri-tjetrit,” tha presidenti i Ukrainës.
Zelensky tha gjithashtu se “ky takim tregon mbështetjen e kryeministrave, si dhe të popujve të tyre, për integritetin tonë territorial, sovranitetin tonë, kursin tonë drejt anëtarësimit të plotë në BE, si dhe domosdoshmërinë për të sjellë të gjithë kriminelët rusë të luftës para përgjegjësisë për atë që ata kanë bërë kundër Ukrainës në tokën tonë dhe kundër Evropës”.
“Ne jemi dakord që një mbështetje edhe më e fortë për Ukrainën duhet të jetë një përgjigje taktike efektive ndaj agresionit të Rusisë. Paketa e shtatë e sanksioneve duhet të jetë po aq e dukshme për vendin agresor sa të gjashtë të mëparshmet së bashku,” tha ai.
