Një shqiptar u dënua me 19 vite burg në Britaninë e Madhe pasi goditi me thikë 29 herë bashkëshorten e tij në shtëpinë e tyre.
Sipas Mirror, Zef Gjoni, 28 vjeç, tentoi edhe të mbysë bashkëshorten Denisa Fuli me një batanije, por për fat të mirë ajo mbijetoi.
Pasi e goditi me thikë plot 29 herë, ai e pyeti të shoqen: “Akoma nuk ke vdekur ti?”
Një gjykatë në Angli dëgjoi se si shqiptari i kishte shkaktuar të shoqes 17 plagë që mund t’i rrezikonin jetën. Megjithatë ajo pretendoi sërish se ai e goditi me thikë për shkak të izolimit nga pandemia.
Por gjykata vendosi ta dënojë shqiptarin me 19 vite burg për tentativë vrasje.
Gjykatësi tha se Gjoni tregoi një shkallë planifikimi të sulmit.
“Ti përbën rrezik domethënës se mund t’u shkaktosh dëme të tjerëve, veçanërisht atyre që janë pranë teje, sidomos në kohë stresi,” tha gjykatësi.
Fuli, shtetase rumune, u sulmua në shtëpi më 1 prill 2020, në javën e dytë të izolimit.
Atë ditë, Gjoni i kishte thënë se “sot ose do vdesësh ti dhe unë do të shkoj në burg, ose do vdes unë dhe ti do të shkosh në burg”.
Natën, Fuli u zgjua nga gjumi dhe e pa veten të lidhur. Prokuroria tha se Gjoni e goditi vazhdimisht me dy thika që i kishte marrë në kuzhinë, ndërkohë që e pyeste vazhdimisht: Akoma nuk ke vdekur?
Pas krimit, ai telefonoi urgjencën duke thënë se kishin pasur një sherr dhe se ajo kishte tentuar të vriste veten me thikë në zemër.
Edhe pse ai i qëndroi historisë së tij, policia zbuloi se viktima nuk mund të godiste veten me thikë në atë mënyrë.
