Anëtarët e Parlamentit Evropian votuan të mërkurën për të ndaluar shitjen e makinave të reja me motor me djegie deri në vitin 2035, në atë që do të ishte një nga ligjet më të forta në botë për heqjen e automjeteve me benzinë, nëse miratohet nga Këshilli Evropian. CNN shkruan se ndërsa masa duhet ende të debatohet nga Këshilli dhe të miratohet në ligj, votimi parlamentar shihet si hapi më vendimtar në proces.
Miratimi i plotë ka të ngjarë të nënkuptojë një rënie në shitjet për makinat hibride dhe një tranzicion të shpejtë drejt modeleve plotësisht elektrike. Mbështetja për masën vjen pas një sërë refuzimesh të politikave të tjera kryesore të klimës të mërkurën.
Një fraksion parlamentar i qendrës së djathtë kishte shprehur kundërshtimin ndaj ndalimit 100% deri në vitin 2035. Disa ligjvënës kishin kërkuar në vend të kësaj një ndalim prej 90%, që do të thotë se një e dhjeta e të gjitha shitjeve të makinave të reja mund të jenë ende motorë me djegie.
“Jam shumë i lehtësuar dhe i lumtur me rezultatin,” tha ligjvënësi holandez Jan Huitema, i cili udhëhoqi në hartimin e politikës.
Parlamenti më parë hodhi poshtë tre propozime të tjera kyçe, duke përfshirë politikën e tij qendrore për të reformuar tregun e tij të karbonit.
