Kreu i Partisë Agrare Ambientaliste, Agron Duka i është përgjigjur sot deklaratave të mbrëmshme të kreut të Bashkisë Durrës, Vangjush Dako në emisionin “Opinion”, nga ku Dako i cilësoi “mediokër” mbështetësit e PAA.
“Ndoqa mbrëmë emisionin “Opinion”, ku po diskutohej për çështjen e projektit “Veliera” në Durrës dhe natyrisht që kryebashkiaku Vangjush Dako nuk mund të zhgënjente as kësaj here me deklaratat dhe qëndrimet e tij delirante.
Por veçoj pjesën kur iu referua Partisë Agrare Ambientaliste teksa tha se “protesta për projektin “Velieria” po dirigjohet nga mediokrit e PAA-së”. Në fakt nëse mund të flasim për kryebashkiakë mediokër, i pari që të vjen ndër mend është Vangjush Dako. PAA ishte e para që e denoncoi publikisht masakrën ekologjike dhe shkatërrimin e vlerave të trashëgimisë kulturore në Durrës përmes këtij projekti.
Ne protestuam në kantierin alla-Dako dhe e ngritëm gjithashtu në Kuvend këtë problem, jo sepse jemi kundër projekteve të tilla, por në mënyrë kategorike jemi kundër abuzimit që po kryhet me këtë projekt. Është e kuptueshme që Vangjush Dako është kapur gafil te “Veliera”, prandaj llomotit nëpër studio televizive në përpjekjen e radhës për të mbuluar zullumet si kryebashkiak i Durrësit”, tha Duka.
