Rusia vijon luftën e saj ndaj terroristëve në Siri, pasi avionët luftarakë kanë kryer 41 fluturime dhe kanë shkatërruar 146 objektiva terroriste në qytetin historik të Palmyra.
Lajmi është konfirmuar nga Ministria e Mbrojtjes ruse e cila ka theksuar se këto sulme janë kryer në harkun kohor të dy ditëve.
“Nga e marta deri të enjten (22-24 mars) aeroplanë luftarakë të Forcave të Hapësirës ajrore ruse kanë kryer 41 fluturime duke mbështetur ushtrinë siriane me qëllim për të shkatërruar Shtetin Islamik të ISIS-it. Bombardimet janë kryer në zonën historike të Palmyra në Siri. Si rezultat i bombardimeve ruse janë shkatërruar 146 objektiva terroriste”, thuhet në reagimin e ministrisë ruse.
Më 14 mars, Rusia njoftoi se do të fillojë tërheqjen e shumicës së forcave të saj nga Siria, pasi operacionet pas 5 muajsh i kanë arritur qëllimet e tyre.
