Ish-kryeministri Sali Berisha tha këtë të Premte se “nuk i njohim Ramës të drejtën legjitime” për të propozuar Presidentin e ri.
“Ne nuk i njohim të drejtë legjitime Edi Rama për të propozuar Presidentin e Republikës, duke pasur parasysh masakrën, batërdinë e madhe zgjedhore që ai bëri me armatën e patronazhistëve, me përdorimin e të gjithë segmenteve të shtetit në fushatë elektorale, me përdorimin e dumanëve dhe bandave dhe sasinë kolosale të parave të krimit anë e mbanë vendit. Ne kemi bindjen më të thellë se zgjidhja e vetme do të ishte e drejtë një president i propozuar nga opozita. Edi Rama, në vend të kësaj praktike e bazuar në dokumente analoge ndërkombëtare siç është rezoluta e Parlamentit Europian e vitit 2002, zgjodhi lojën me kukulla dhe pseudoopozitë. Një lojë që mund të quhet si një shpifësirë e neveritshme. I kaloi raundet me gjasme, “po ja, po pres nga opozita”, manipuloi në mënyrë në mënyrë të paskrupullt dhe sot mbledh Kryesinë për t’i komunikuar presidentin dhe për të marrë kështu 100% të pushteteve në këtë vend, njësoj si Aleksandër Lukashenko. Edi Rama nga nesër do të quhet në të gjithë Evropën, Aleksandër Lukashenko Bis. Sepse ai sot ka 91 % të pushtetit, me marrjen dhe të presidencës ai shkon në pushtet absolut“, tha Berisha në një deklaratë për mediat.
Kreu i PD-së shtoi se detyrë urgjente e opozitës së vërtetë dhe aleatëve të saj që ti japin përgjigjen e merituar Edi Ramës në një kohë sa më të shkurtër.
Berisha tha se në seancën për raundin e katër do jenë në parlament për të votuar dhe do të votojnë kundër. “Kemi një rezolutë në Këshillin Kombëtar që s’pranon bojkot”, sqaroi Berisha.
