Në 3 qershor, Këshilli Kombëtar i Partisë Demokratike, pritet të zgjedhë nënkryetarët dhe Sekretariatin, por edhe atë që konsiderohet si Gjykata e Partisë, e cila ka në përbërje 5 anëtarë.
Ndërkohë që deri më tani vetëm Oerd Bylykbashi ka deklaruar publikisht se do të garojë për postin e nënkryetarit, mësohet se gjithashtu për nënkryetar mund të garojë edhe Luçiano Boçi.
PD ka të përcaktuar në statut dy nënkryetarë, njvri prej të cilëve merr drejtimin e Grupit Parlamentar dhe tjetri nënkryetar i Kuvendit. Nuk dihet nëse Bylykbashi dhe Boçi mund të garojnë përballë njëri-tjetrit, apo secili prej tyre do të synojë një nga pozicionet e nënkryetarëve duke pasur si rivalë të tjerë emra.
Në garë për një nga pozicionet drejtuese janë edhe Belind Këlliçi dhe Famur Noka, që mund të garojnë për Sekretar i Përgjithshëm.
Përballjen mes tyre do ta ndajnë anëtarët e Këshillit Kombëtar me votim të fshehtë.
PD po plotëson vendet e mbetura vakante pas Kuvendeve Kombëtare të zhvilluara në dhjetor 2021 dhe prill 2022, ndërsa Gjykata e Apelit ende nuk ka marrë një vendim se cili nga grupimet do të ketë vulën dhe siglën e kësaj force politike.
