Nëntëmbëdhjetë fëmijë të vegjël dhe dy të rritur kanë vdekur nga të shtënat në një shkollë fillore në Teksasin jugor. 18-vjeçari i armatosur hapi zjarr në shkollën fillore Robb në qytetin e Uvalde para se të vritej nga forcat e rendit, thanë zyrtarët.
Hetuesit thonë se i dyshuari ishte i armatosur me një pistoletë, një pushkë gjysmë automatike AR-15 dhe karikatorë me kapacitet të lartë.
Salvador Ramos vrau fillimisht gjyshen e tij, dhe më pas ka bërë një aksident automobilistik pranë shkollës fillore. Ai doli nga makina me një pushkë dhe hyri në ndërtesën e shkollës duke hapur zjarr në disa nga klasat.
Pak dihet për Ramos: ai ishte një gjimnazist në zonë dhe pak para masakrës kontaktoi me një të panjohur në Instagram duke i thënë se kishte një sekret që donte ta tregonte: “Unë jam gati të …”.
Megjithatë, ai nuk i ka rrëfyer vajzës se cili ishte gjesti i çmendur që kishte në mendje dhe që e përfundoi disa orë më vonë. Në llogarinë e tij në Instagram, vrasësi ka postuar një selfie dhe foto të armëve, mes të cilave një me dy pushkë. Nuk dihet nëse këto janë armët e përdorura për masakrën. Ajo që dihet është se djali ka blerë dy pushkë për ditëlindjen e tij të 18-të.
Shefi i Policisë së Distriktit të Pavarur të Shkollës Uvalde, Pete Arredondo tha se të shtënat filluan në orën 11:32 me orën lokale të së martës dhe se hetuesit besojnë se agresori “veproi i vetëm gjatë këtij krimi të tmerrshëm”.
Guvernatori i Teksasit Greg Abbott tha se agresori, braktisi një automjet përpara se të hynte në shkollë për të hapur zjarr “të tmerrshëm, në mënyrë të pakuptueshme”.
Një nga të rriturit e vrarë ishte një mësuese, e cila është përmendur në mediat amerikane si Eva Mireles.
Agjencia e lajmeve Associated Press raporton se një zyrtar i Patrullës Kufitare të SHBA-së, i cili ishte afër kur filluan të shtënat, hyri me shpejtësi në shkollë dhe qëlloi dhe vrau personin e armatosur, i cili ndodhej pas një barrikade.
Dy agjentë kufitarë thuhet se u qëlluan gjatë shkëmbimit të zjarrit me të riun, një prej të cilëve mori plumb në kokë, por fatmirësisht në gjendje stabël për jetën.
Një grua 66-vjeçare dhe një vajzë 10-vjeçare janë në gjendje kritike në një spital në San Antonio, thonë zyrtarët e spitalit Universitar Shëndetësor.
Në një fjalim nga Shtëpia e Bardhë, Presidenti i SHBA Joe Biden tha se autori ishte “i sëmurë dhe i lodhur”, ndërsa bëri thirrje për kontrollin e armëve.
“Sa shumë fëmijë të vegjël që panë atë që ndodhi – shohin miqtë e tyre të vdesin, sikur të jenë në një fushë beteje, për hir të Zotit,” tha ai. “Ata do të jetojnë me të pjesën tjetër të jetës së tyre.”
Ai urdhëroi që flamujt në Shtëpinë e Bardhë dhe ndërtesat e tjera federale të SHBA-së të qëndrojnë në gjysmështizë për nder të viktimave në Uvalde.
Dita e fundit e mësimit për nxënësit e rrethit shkollor ishte caktuar të enjten. Por të gjitha klasat dhe aktivitetet tani janë anuluar për pjesën e mbetur të vitit.
