Rrëzohet kërkesa e opozitës për ngritjen e një komisioni hetimor për të hetuar investimet strategjike. Kërkesa është marrë në shqyrtim nga Konferenca e Kryetarëve, por sipas kreut të Grupit Parlamentar socialist, Taulant Balla, ajo është rrëzuar pasi nuk përmbushte numrin e nevojshëm të firmave prej 35 deputetësh.
“Kërkesa sapo është depozituar, pasi jemi informuar se nuk përmbushte numrin minimal të deputetëve firmëtarë që mbështesin komisionin hetimor. Ju e dini se duhen 35 firma të tilla”, tha Balla.
Opozita kërkoi më herët që ky komision të përbëhej nga 15 anëtarë, 7 nga opozita dhe 8 nga mazhoranca, dhe veprimtaria e tij ishte 4 muaj.
Në një reagim në Twitter, Gazment Bardhi, krahas publikimit të kërkesës, hodhi akuza ndaj kryeministrit Edi Rama se ky i fundit ka ndarë pronat publike për familjarët e miqtë e tij, duke përdorur ligjin për investime strategjike.
