Presidenti i ri i Shqipërisë duket se do të zgjidhet në raundin e 4-t, i cili përkon me javën e parë të muajit qershor, ndërsa me shumë gjasa edhe raundi i 3-të që do të mbahet më 30 maj do të digjet pa një kandidat, ashtu si edhe dy raundet e tjera.
Në raundin e 4 dhe të 5-të, Presidenti zgjidhet me 71 vota, ndërsa në e raundet e para duhen të paktën 84 vota, çka detyron opozitën dhe mazhorancën të dakordësohen për zgjidhje konsensuale. Por në kushtet kur s´ka konsensus, gjë që u evidentua edhe sot në mbledhjen e Konferencës së Kryetarëve, duket se socialistët do të shkojnë drejt raundit të 4 për zgjedhjen e Kreut të Shtetit.
Deputetja Mesila Doda u shpreh se problemi i fundit që duhet vendosur është data dhe ora se kur do të mbahet raundi i rradhës.
“Çështja është a do të kemi apo jo negociata? A do të luajmë teatër para shqiptarëve, të bëjmë sikur po gjejmë një President konsensual, apo do të ndërmarrim një proces serioz? Unë mendoj se nuk duhet ti bëjmë bisht këtij momenti, duhet të hyjmë në diskutimin e emrave konkretë, pra të tregohemi seriozë ose të themi që s´do ketë proces dhe të presim raundin e 4-t”, tha Doda.
Deputeti Fatmir Mediu në fjalën e tij tha se që në fillim ka thënë se çështja nuk është si do të veprojë mazhoranca, dua tu bëj thirrje kolegëve të mi të opozitës ka ardhur koha të dalim me një kandidaturë të vetme, s’kemi kohë as për 8 e as për 10 që ne të futemi në një proces serioz.
“Besoj që pavarësisht nga diferencat e vogla që kemi për të arritur në kompromis duhet të dëgjojmë dhe të respektojmë njëri tjetrin. Nëse nuk ccojmë kandidaturë në raundin e tretë ne si opozitë të mos marrim pjesë në këtë proces që e konsiderojmë farsë. Ne kemi përgjegjësinë tonë, kemi një element kushtetues në dorë që ka të bëjë me marrëdhënien tonë me opinionin publik, duhet marrëveshje me mazhorancën në nje kohe të shkurtër përndryshe të refuzojmë zgjedhjen e presidentit konsensual”, shtoi ai.
Enkelejd Alibeaj gjatë fjalës së tij në Konferencën e Kryetarëve tha se mazhoranca po pret raundin e katërt për të zgjedhur presidentin e ri të vendit.
Alibeaj tha se mazhoranca u tërhoq nga marrëveshja që kishin rënë dakord më parë, pasi duan një president që ta zgjedhin vetë, duke treguar se nuk e kanë seriozisht këtë proces.
“Mbi të gjitha pala tjetër cfarë qëndrimi ka? Ne duhet të nxjerrim presidentin e vendit në një proces do të duhet të ketë sintetizim të të gjitha nevojave kërkesave, të opozitës. Parësore është se cili është qëndrimi i palës tjetër.
Është pala që nuk ka legjitimitet për të zgjedh e vetme presidentin.
Pala tjetër presin raundin e katërt dhe të pestë. Duan të zgjedhin një president të tyre. Ne ramë dakord për një dokument të shkruar.
Nje proces i përbashkët ku opozita të mos ishte mbushëse topi por të vendosej në kushte reale. U tërhoqën, ishte shenja më e fortë që nuk e kanë seriozisht. Duan të shkojnë të raundi i katërt.
Nuk i qëndrojnë fjalës. Nuk është për tu festuar se sa unike dhe solide është opozita. Edhe mund të arrihet. Ai që do të jetë president të ketë se paku 84 vota që ne si kemi, as ju si keni.
Serioziteti e donte që në atë dokument ti shkohej deri në fund.
Në këtë proces ne futemi si një detyrim moral. Nuk është eksperiment se sa unik është njëra pale.
Me këtë proces është me pistoletë mbi tavolinë, po dëshët hajdeni, po deshët mos hajdeni. Lojë farse në sytë e shqiptarëve nuk bëhet”, tha Alibeaj.
Taulant Balla, kreu i Grupit Parlamentar socialist, tha se mazhoranca nuk do të paraqesë asnjë kandidat në raundin e 3-të, ndërsa ftoi opozitën që të vijojë procesin dhe të paraqesë kandidatë. “Sillni emra dhe nëse mes kandidatëve që ju propozoni ka një të tillë që ne do e mbështesim, atëherë unë ju garantoj 74 votat e grupit socialist. Por kandidati që do na sillni duhet të ketë mbështetjen e 20 deputetëve, ju s´mund të sillni një emër dhe të na thoni firmosni si mbështetës”, tha Balla.
