Prokuroria e Posaçme Kundër Korrupsionit dhe Krimit të Organizuar vijon hetimet dhe punën për zbardhjen e disa krimeve të tjera në qytete si Elbasani, Durrësi apo edhe Tirana. Por, për shkak të sekretit hetimor nuk jepet asnjë detaj lidhur me këto ngjarje.
Fax news raporton se janë marrë në mbrojtje familjet e Nuredin Dumanit dhe ajo e Henrik Hoxhajt, të cilët tashmë janë kthyer në bashkëpunëtorë të drejtësisë, duke zbardhur dhjetëra ngjarje që kanë ndodhur dekadën e fundit, duke vënë nën akuzë 32 persona.
Ndërkaq, prokurorët vijojnë punën për gjetjen dhe ballafaqimin provave për disa ngjarje të tjera që dy të penduarit kanë folur përpara prokurororëve të SPAK. Nuredin Dumani, akuzohet për 17 vepra të rënda penale.
Ai vijon të mbahet ende në spitalin e burgut, jo vetëm për të evituar përballjen me të burgosurit e tjerë por edhe se vijon të jetë nën vëzhgimin e mjekëve, ku po trajtohet për shkak ta plagosjes së një muaji më parë.
Ndërsa për të penduarin tjetër Henrik Hoxhajn rëndojnë shtatë akuza kriminale. Dëshmitë e Nuredin Dumanit dhe mikut të tij Hoxhaj çuan në zbulimin e një sërë ngjarjesh kriminale që kishin tronditur vendin. Dhe deri më tani këto dëshmi me kërkesë të SPAK u firmosën plot 32 urdhër arreste.
Referuar dëshmive të te vetë Nuredin Dumanit, SPAK ka dalë në konkluzion se ai ishte ura lidhëse e disa grupeve kriminale, duke nxjerrë në skenë emra të rënësishëm të botës së nëndheshme si Suel Çela, Ervis Martinaj, Florenc Çapja, Talo Çela, Kamber Mehja, me të cilët kishte bashkëpunuar e kishte marrë porosi për disa krime të rënda, me vlera monetare që shkonin nga 30 mijë deri në 500 mijë Euro.
Gjithashtu nga hetimet për këtë dosje mësohet se grupet kriminale ishin në gjendje të paguanin shuma të konsiderueshme parash për vrasjen e kundërshtarëve të tyre.
